Хусусан, 2024 йил 3 май куни Ўзбекистон Республикаси Президентининг “Пилла етиштириш ва ипакчилик соҳасида бозор механизмларини жорий қилишни жадаллаштириш бўйича қўшимча чора-тадбирлар тўғрисида”ги Фармони қабул қилинди.

Мазкур ҳужжатда пилла етиштириш ва ипакчиликни янги босқичга олиб чиқиш бўйича устувор йўналишлар белгиланди. Жумладан, инвестиция муҳитини яхшилаш, хомашё базасини кенгайтириш, ипак қурти уруғи ҳажмини кўпайтириш, пиллакорларни қўллаб-қувватлаш, янги ишлаб чиқариш қувватларини ишга тушириш орқали бандлик даражасини икки бараварга ошириш ва бозор механизмларини жадаллаштириш вазифалари илгари сурилди.

Ўтган йили пиллани қайта ишлаш корхоналари томонидан ишлаб чиқарилган маҳсулотлар Ҳиндистон, Ветнам, Озарбойжон ва Тожикистон каби давлатларга экспорт қилинди. Жорий йилда эса Фориш туманидаги пиллакорлар 933 қути ипак қурти уруғидан пилла тайёрлашни режалаштирган.

Фермер хўжаликлари ва 680 нафар касаначилар билан шартномалар тузилиб, ишлаб чиқариш жараёни йўлга қўйилди.

Бир қутида 19,5 грамм ипак қурти мавжуд бўлиб, ундан саноат учун 50–55 килограмм пилла олинади. Агар бир килограмм пилла учун касаначига 40 000 сўм тўлов амалга оширилишини ҳисобга олсак, бир қути ипак қуртини парваришлаган пиллакор бир ойда икки миллион сўмдан ортиқ даромад олиш имкониятига эга.

Республикамизда пиллачилик соҳасини жадал ривожлантиришга оид қатор қарорлар ҳаётга изчил татбиқ этилмоқда. Айниқса, пилла хом ашёсини чуқур қайта ишлаш ҳамда соҳага тўғридан-тўғри хорижий инвестицияларни жалб қилиш масалаларига алоҳида эътибор қаратилмоқда.
Фориш туманида ипак қуртининг асосий озуқа манбаи бўлган тутчиликни ривожлантириш, янги тутзорлар барпо этиш борасида ҳам изчил ишлар амалга оширилмоқда.

Жумладан, Фориш туман экология ва атроф-муҳитни муҳофаза қилиш бўлими, “Учма” маҳалласи ва “Фориш агропилла” МЧЖ раҳбарияти ҳамкорлигида  “SILK EXPERT PROCESSING” МЧЖ томонидан “Учма” ва “Ўхум” маҳаллаларидаги Ўхум, Абдукарим, Деристон, Боломон, Бирлашган ҳамда Учма қишлоқлари аҳолиси томорқаларидан самарали фойдаланиш мақсадида 27 500 туп тут кўчати тарқатилди.

2025 йил баҳор мавсумида туманда 80 мингдан ортиқ тут кўчатлари якка қаторларга ва қайта ўзлаштирилган тутзор майдонларига экилди.
Ипак қурти учун озиқа захирасини яратиш мақсадида 197,1 гектар майдонда маҳаллийлаштирилган тут кўчати навлари парваришланмоқда.

Айни пайтда туманда маҳаллий ҳамда Хитой ипак қурти уруғлари асосида фермер хўжаликлари ва касаначилар томонидан қурти парвариши ишлари қизғин давом этмоқда.

Қабулдан сўнг, Ҳурматли Президентимиз ташаббуси билан амалга оширилаётган “Обод хонадон – обод кўча – обод маҳалла” дастури доирасида Нурафшон маҳалласида учрашув ўтказилди. Учрашувда маҳалла инфратузилмасини яхшилаш, ижтимоий соҳа объектлари ҳолатини ўрганиш, меҳнатга лаёқатли ишсиз фуқароларнинг бандлигини таъминлаш, тадбиркорлик кўникмаларини шакллантириш, ижтимоий ҳимояга муҳтож оилалар ва хотин-қизларни қўллаб-қувватлаш, шунингдек, оилаларда ижтимоий-маънавий муҳитни мустаҳкамлаш масалалари муҳокама қилинди.

Учрашув Нурафшон маҳалла фуқаролар йиғинининг янгитдан таъмирланган биносида бўлиб ўтди. Маҳалла ҳудудида 15 та кўчада инфратузилмани яхшилаш бўйича кенг кўламли ишлар амалга оширилди. Жумладан, 8 километр йўл шағаллаштирилди, 600 дан ортиқ хонадонларда “Хонадон маданияти” жорий этилди, 500 метр пиёдалар йўлаги қурилиб фойдаланишга топширилди.

Энергетика соҳасида эса 1 та янги трансформатор ўрнатилиб, 4 та трансформатор ва 4 км электр тармоғи мукаммал таъмирланди. Шунингдек, 2 та трансформатор ва 4 км электр тармоғи жорий таъмирланди ҳамда 120 дона темир-бетон устунлар ўрнатилди.

Газ таъминотини яхшилаш мақсадида 2 та замонавий газ тақсимлаш пункти ўрнатилди, 3,2 км юқори босимли газ қувури таъмирланди, 350 метр янги газ қувурлари тортилиб, 3,8 км ички газ тармоғи таъмирдан чиқарилди.
Ичимлик суви таъминотини яхшилаш учун 8 километр янги сув тармоғи тортилиб, 200 та хонадон тоза ичимлик суви билан таъминланди. Бу ҳақда туман ҳокими Бекзод Тушпўлатов маълум қилди.

Албатта, амалга оширилган бу ишлар маҳалла аҳолисининг турмуш даражасини оширишга хизмат қилади.

Жиззах вилоятида жорий йилги пахта экиш мавсуми қизғин паллага кирган. Вилоят бўйича 2 104 та пахтачиликка ихтисослаштирилган фермер хўжаликлари 67 600 гектар майдонда чигит экишни режалаштиришган. Ушбу режалар изчиллик билан амалга оширилмоқда, бугунги кунга қадар 28 381 гектар ерда чигит экиш ишлари тўлиқ якунланди.

Мисол тариқасида, Арнасой туманида 332 та пахтачиликка ихтисослашган фермер хўжаликлари 7 200 гектар майдонда чигит экиш вазифасини ўз зиммаларига олган бўлсалар, бугунгача улар 3 029 гектар ерда чигит экиш ишларини тўлиқ амалга оширишга эришишди.

Шунингдек, Пахтакор туманидаги 241 та фермер хўжалиги 11 500 гектар ерга чигит экишни режалаштирган бўлиб, айни вақтда 4 615 гектар майдонга чигит қадалди.

Фермерлар ўртасида яратилаётган ҳамжиҳатлик, юртимизда агросаноат соҳасини янада ривожлантиришга қаратилган ислоҳотлар, қишлоқ хўжалигидаги замонавий ёндашувлар ва илғор тажрибалар – буларнинг барчаси юртимиздаги пахтачилик соҳасида юқори натижаларга эришиш учун мустаҳкам пойдевор бўлиб хизмат қилмоқда.

Меҳнаткаш деҳқон ва фермерларимизнинг соф ният, сидқидилдан қилинаётган заҳматли меҳнати, албатта, ўз мевасини беради.

Жиззах шаҳридаги Эски шаҳар деҳқон бозори ҳудудида ҳозирги кунда кенг кўламли қурилиш ва таъмирлаш ишлари олиб борилмоқда.

Мазкур ишлар Жиззах вилояти ҳокимининг бевосита ташаббуси билан амалга оширилмоқда.

Эски шаҳар деҳқон бозори ҳудудида мавжуд муаммоларга ечим топиш, сотувчи ва харидорлар учун қулай шарт-шароитлар яратиш мақсадида замонавий талабларга жавоб берадиган янги савдо расталари барпо этилмоқда.

Шу билан бирга, ҳудудда кенг кўламли таъмирлаш ва ободонлаштириш ишлари ҳам олиб борилмоқда.

Айни пайтда бозорда ободонлаштириш ва кўкаламзорлаштириш ишлари амалга оширилмоқда.

"Яшил макон" умуммиллий лойиҳаси доирасида 2000 та буталар ва 200 га яқин павлония турига мансуб манзарали дарахт кўчатлари экилди.

Шунингдек, ҳудуддаги фавворалар таъмирланиб, қайта ишга туширилди.

Бозор ҳудудидаги улгуржи озиқ-овқат савдо маркази ҳам замон талабларига мос равишда таъмирланмоқда.

Бозор ичидаги узунлиги 20 метр, эни 3 метр бўлган 3 та айвонда ҳам қурилиш ва таъмирлаш ишлари амалга оширилмоқда.

Илгари бу ерда сотувчилар қуёш ва ёмғирдан ҳимоясиз ҳолда, ноқулай шарт-шароитда савдо қилишга мажбур эдилар. Эндиликда эса улар учун барча қулайликларга эга махсус савдо расталари барпо этилмоқда.

Савдо расталари атрофига оқова сув тармоқлари учун кичик бетон ариқлар ҳам ўрнатилди.

Эътиборли жиҳати шундаки, энди сотувчилар маҳсулот турлари бўйича алоҳида жойларда савдо қилишади.

Бозор ҳудудидаги барча савдо расталарининг том қисми янги аликофон материаллари билан тўлиқ қопланди. Қурилиш ишлари якунлангач, бозорда 30 га яқин янги савдо жойлари яратилиши режалаштирилган.

Бундан ташқари, бозорнинг электр таъминотини яхшилаш мақсадида 40 киловаттлик қуёш панеллари ўрнатилди. Ҳозирда эса яна 60 киловаттлик қуёш панеллари учун махсус майдон тайёрланмоқда.

Авваллари бозордаги ички йўлаклар таъмирталаб ҳолатда бўлиб, ёзда чанг, қишда эса лой билан қопланган эди. Ҳозирда 1000 квадрат метр майдондаги йўлаклар асфальтланди ва улардан фойдаланиш хавфсизлиги таъминланди.

150 метр масофада оқова сув тармоғи учун бетон ариқлар ўрнатилди.
Бозор ҳудудида тунги ёритиш чироқлари ва янги баннерлар ҳам ўрнатилди. Шу билан бирга, ҳудудда жойлашган “Олтин Тож” хусусий авто шохбекати ҳам янгиланиш ишларидан четда қолмади.

Бекат раҳбари Асқар Азимов ташаббуси билан бу ерда ҳам кенг кўламли таъмирлаш ишлари амалга оширилди. Сув қувурлари ирригация тармоқларига уланиб, бетон ариқлар ётқизилди.

Эски шаҳар деҳқон бозорида ташкил этилган арзонлаштирилган озиқ-овқат ва қишлоқ хўжалиги маҳсулотлари савдо ярмаркасининг санитария талабларига мувофиқ фаолият юритиши бозор маъмурияти томонидан доимий назоратга олинган.

Айтиш жоизки, Эски шаҳар деҳқон бозорида амалга оширилаётган бу каби қурилиш, таъмирлаш ва пардозлаш ишлари нафақат харидорлар, балки сотувчилар ва маҳаллий тадбиркорлар учун ҳам катта қулайликлар яратаётгани шубҳасиз.

Қабул жараёнида вилоят ҳокими ўринбосарлари, соҳавий ташкилотлар раҳбарлари, шаҳар ва туман ҳокимлари ҳамда Халқ қабулхоналарининг масъул ходимлари иштирок этдилар.

Фуқаролар мурожаатларини тўғридан-тўғри эшитиш ва уларга қулайлик яратиш мақсадида қабул жойлардаги Халқ қабулхоналари орқали ташкил этилди. Қабул давомида мурожаат этган фуқароларнинг муаммолари эшитилиб, айрим масалалар жойида ҳал этилди, бошқалари бўйича эса қўшимча ўрганиш ва тегишли чора-тадбирларни белгилаш юзасидан мутасаддиларга топшириқлар берилди.

Мурожаатларда асосан ижтимоий ҳимоя, коммунал хизматлар, иш билан таъминлаш, соғлиқни сақлаш, уй-жой масалалари ва инфратузилмани яхшилаш каби долзарб йўналишлар бўйича муаммолар кўтарилди. Барча масалалар қонунчилик доирасида ўрганилиб, белгиланган муддатларда амалий ечим топиш бўйича вилоят ҳокимининг ўринбосарлари, масъул раҳбарлар ва маҳаллий ҳокимият органларига тегишли кўрсатмалар берилди.

Бундай оммавий қабуллар вилоят аҳолиси билан очиқ мулоқотни таъминлаш, муаммоларни манзилли ҳал этиш ва давлат органлари фаолияти самарадорлигини оширишда муҳим аҳамият касб этмоқда. Шу билан бирга, халқ ва ҳокимият ўртасидаги ишончни мустаҳкамлашда муҳим омил сифатида хизмат қилмоқда.

Бу ташаббус Ҳурматли Президентимиз Шавкат Мирзиёевнинг 2024 йил 8–9 апрель кунлари вилоятимизга амалга оширган ташрифи давомида берган топшириқлари ва 2025 йил 21 январьдаги қарорида белгиланган бандлик ҳамда камбағалликни қисқартириш бўйича стратегик чора-тадбирлар асосида амалга оширилди.

Тантанали тадбирда Ғаллаорол тумани ҳокими Жалолитдин Оқбоев ҳамда Туризм қўмитасининг масъул вакили Иброҳим Барноев иштирок этиб, Узунбулоқ маҳалла раисига “Туризм маҳалласи” сертификатини топширди.

Шу билан бирга, икки нафар маҳаллий тадбиркорга оилавий меҳмон уйларини ташкил қилгани учун сертификатлар тақдим этилди.

Бу нафақат туризм инфратузилмасининг кенгайишига хизмат қилади, балки маҳаллий аҳоли учун даромад манбаига айланиши кутилмоқда.

Тадбир доирасида ўтказилган “Ўзбекистон бўйлаб саёҳат қил!” ички туризм ярмаркаси юртимиздаги сайёҳлик салоҳиятининг қанчалик кенгайиб бораётганини кўрсатди.

Ярмаркада ҳунармандлар ўз маҳсулотларини намойиш қилишди, туркомпаниялар эса янги туристик пакетларни таклиф этишди.

Бу каби фаолиятлар ички туризмнинг динамизмини оширади ва хизматлар диверсификациясини таъминлайди.

Бугунги кунда Узунбулоқда 10 дан ортиқ оилавий меҳмон уйи, 8 та ҳунарманд, 5 та овқатланиш шаҳобчаси, 2 селфи маскани ва 3 та савдо маркази фаолият юритмоқда.

Айниқса, “Саъд ибн Абу Ваққос” зиёратгоҳининг мавжудлиги бу ҳудудни зиёрат ва маънавий туризм марказига айлантириш имконини беради.

Туризм инфратузилмаси ривожисиз барқарор ўсиш бўлмайди. Шу боисдан, “Саъд ибн Абу Ваққос” зиёратгоҳига олиб борувчи 3,1 километр асосий йўлни 1 миллиард 833 миллион сўмлик таъмирлаш лойиҳаси амалга оширилди. Бундан ташқари, Авлиё қишлоғи ички йўлининг 0,75 км. қисми шағаллаштирилиб, йўл белгилар билан жиҳозланди. Бу чора-тадбирлар маҳаллага кириб келаётган сайёҳлар учун қулайлик ва хавфсизликни оширади.

Жиззах вилояти раҳбарияти ҳудудий туризмни ривожлантиришда изчил ёндашувни давом эттирмоқда.

Режаларга кўра, 2025 йил якунига қадар Фориш туманидаги “Ухум” ва Бахмал туманидаги “Новқа” маҳаллаларига ҳам “Туризм маҳалласи” мақоми берилиши кутилмоқда.

Бу орқали вилоят бўйича туризм кластерлари кенгайиб, ҳар бир туман ўзига хос сайёҳлик йўналишига эга бўлиши мумкин.

Вилоят ҳокимлиги, Ташқи ишлар вазирлиги, Инвестициялар, саноат ва савдо вазирлиги, Хорижий инвестицияларни жалб этиш агентлиги ҳамда қатор халқаро ташкилотлар ҳамкорлигида ташкил этилган мазкур форумда жаҳоннинг 40 га яқин давлатидан 300 дан ортиқ инвестор ва ишбилармон доира вакиллари, маҳаллий тадбиркорлар, давлат органлари ва ҳамкор ташкилотлар иштирок этди.

Форум доирасида Жиззах вилоятининг инвестициявий имкониятлари, қишлоқ хўжалиги, саноат, туризм ва хизмат кўрсатиш соҳалари бўйича лойиҳалар тақдимоти ҳамда хорижий инвесторлар учун яратилаётган имтиёзлар ва қулай шарт-шароитлар муҳокама қилинди.

Жиззах вилояти ҳокими вазифасини бажарувчи Улуғбек Мустафоев тадбирда иштирок этиб, барча меҳмонларни самимий қутлади. Учрашувлар давомида савдо-иқтисодий, инвестициявий ва саноат соҳаларида ҳамкорлик қилиш истиқболлари муҳокама қилинди. Шу билан бирга, вилоятнинг саноат инфратузилмаси ва қулай бизнес муҳити иштирокчиларга яқиндан таништирилди.

Форум доирасида Улуғбек Мустафоев мамлакатдаги элчилар ҳамда хорижий бизнес доира вакиллари билан қатор самарали учрашувлар ўтказди. Натижада, бир қатор лойиҳаларни амалга ошириш бўйича дастлабки келишувларга эришилди. Томонлар ўзаро манфаатли ҳамкорликни кенгайтиришга тайёр эканликларини таъкидладилар.

Форум иштирокчилари учун махсус кўргазмалар, B2B форматдаги учрашувлар ва инвестиция лойиҳалари тақдимотлари ташкил этилди. Шунингдек, меҳмонлар Зомин туманидаги табиий гўзалликлар ва сайёҳлик объектлари билан танишиш имкониятига эга бўлдилар.

Форумнинг иккинчи кунида Суффа платосида замонавий экстремал спорт тури — Зиплине маскани ишга туширилди. Ушбу иншоот нафақат ҳаваскорлар, балки профессионал спортчилар учун ҳам мўлжалланган бўлиб, табиат бағрида фаол дам олиш ва адреналинни ҳис қилиш истагидаги фуқаролар учун янги имкониятлар яратади.

Очилиш маросимида вилоят ҳокимининг биринчи ўринбосари Зафар Азимов иштирок этиб, мазкур лойиҳанинг аҳамияти ҳақида маълумот берди. Хорижий ва маҳаллий меҳмонлар ҳам тантанали очилишда қатнашиб, Зиплине масканининг имкониятлари билан яқиндан танишдилар.

Янги лойиҳа нафақат туризмни ривожлантириш, балки маҳаллий аҳоли бандлигини таъминлаш ва ёшлар ўртасида соғлом турмуш тарзини тарғиб этишда муҳим аҳамият касб этади.

Форум доирасида иштирокчилар Зомин туманидаги ишлаб чиқариш корхоналарини кўздан кечириб, “Зомин технопарки” махсус саноат зонасида ташкил этилаётган йирик инвестиция лойиҳалари билан ҳам танишдилар.

“Халқаро бизнес форум – Жиззах 2025” Жиззах вилоятини янги босқичда глобал иқтисодий ҳамкорлик сари етакловчи муҳим майдон бўлиб хизмат қилмоқда.

Ташриф доирасида делегацияни Жиззах вилояти ҳокими вазифасини бажарувчи Улуғбек Мустафоев қабул қилди. Учрашув доирасида икки томонлама ҳамкорликни янада кенгайтириш, инвестиция лойиҳаларини йўлга қўйиш ва мавжуд имкониятлардан самарали фойдаланиш борасида атрофлича фикр алмашилди.

Делегация таркибидан Хитойнинг саноат ва технология соҳасида етакчи бўлган 13 та йирик компания вакиллари иштирок этди. Улар қаторида:

Zhejiang Jiayi Biotechnology – биотехнология соҳасида фаолият юритувчи компания, Zhejiang Daoyuan Industrial Investment – саноат инвестициялари билан шуғулланувчи компания, Haitian Construction Group – қурилиш соҳасида етакчи холдинг, Chongqing Weilang Technology (Group) – юқори технологияларга ихтисослашган гуруҳ ва Jubo Industrial Technology (Hangzhou) ва бошқалар каби компаниялар бор.

Улар Жиззах вилоятининг саноат инфратузилмаси, технопарклари, логистика имкониятлари ва ишлаб чиқариш салоҳияти билан танишишдан манфаатдор эканини билдирди.

Учрашувда Ван Юйчэнь, аввало, самимий қабул учун миннатдорлик билдириб, Чжэцзян провинцияси ҳамда Жиззах вилояти ўртасидаги иқтисодий алоқалар йилдан-йилга ривожланаётганини таъкидлади. У, шунингдек, янги инвестиция лойиҳаларини йўлга қўйиш, қўшма корхоналар ташкил этиш ва технологиялар алмашинуви юзасидан аниқ таклифлар билан чиқди.

Ўз навбатида, Улуғбек Мустафоев делегация аъзоларига Жиззах вилоятида хорижий инвесторлар учун яратилган қулай шарт-шароитлар, солиқ ва божхона имтиёзлари, махсус иқтисодий зоналардаги имкониятлар ҳақида маълумот берди. Шунингдек, вилоятда амалга оширилаётган ривожланиш дастурлари, инфратузилмавий янгиланишлар ва саноатни локаллаштириш жараёнлари ҳақида ҳам сўз юритилди.

Учрашув якунлари бўйича томонлар ўзаро манфаатли ҳамкорликни янада кенгайтиришга келишиб олдилар. Жумладан, қишлоқ хўжалиги маҳсулотларини қайта ишлаш, қурилиш материаллари ишлаб чиқариш, соғлиқни сақлаш воситалари ҳамда биотехнология соҳасида қўшма лойиҳаларни амалга ошириш имкониятлари муҳокама қилинди.

Ушбу ташриф Жиззах вилоятининг халқаро миқёсдаги инвестициявий нуфузини янада оширишга хизмат қилиши шубҳасиз. Икки томонлама муносабатларнинг янада ривожланиши эса нафақат ишлаб чиқариш салоҳиятини ошириш, балки янги иш ўринларини яратиш, маҳаллий иқтисодиётни рағбатлантиришга ҳам хизмат қилади.

Даставвал Устозлар, илмий конференциялар ва танловлар мавзусида янги таклифлар муҳокама қилинди.

Мактабгача ва мактаб таълими вазири Ҳилола Умарова Жиззах вилоятида вилоятдаги таълим муассасалари раҳбарлари ва устозлар билан очиқ мулоқот ўтказди.

Мулоқотда вилоят ҳокими вазифасини бажарувчи Улуғбек Мустафоев ҳам иштирок этди. Тадбирда таълим соҳасининг ривожига қаратилган долзарб масалалар муҳокама қилинди.

Вазир Ҳилола Умарова мулоқот давомида юртбошимизнинг таълим соҳасига кўрсатаётган алоҳида эътиборига тўхталиб, таълимни ривожлантириш борасида барчанинг бирдек масъулиятли эканлигини таъкидлаб ўтди.

Шунингдек, давлат раҳбарининг 51-сонли Фармонида белгиланган топшириқлар ижроси юзасидан фикр алмашилди, мазкур Фармон мазмуни ва моҳияти кенг жамоатчиликка етказишда муҳим вазифалар белгилаб олинди.

Мулоқотда таълим соҳасидаги барча иштирокчиларнинг фикр ва мулоҳазалари эътиборга олиниб, шу билан бирга, таълимни ривожлантириш йўлида ҳамкорликда иш олиб бориш борасида келгусидаги режалаштирилган тадбирлар ҳақида маълумотлар берилди.

Бу каби очиқ мулоқотлар таълим соҳасида юзага келган янги имкониятлар ва инновацион ғояларни ҳаётга татбиқ этишда муҳим ўрин тутади.

Шу билан бирга, Мактабгача ва мактаб таълими вазири Ҳилола Умарова Шароф Рашидов туманидаги 32-мактабда бўлди. Бу ерда Давлатимиз раҳбарининг тегишли қарори асосида “Жасорат мактаби” фаолияти йўлга қўйилган.

Уларда математика, чақирувга қадар бошланғич тайёргарлик, тарих, жисмоний тарбия, чет тили, физика фанлари чуқурлаштирилган ҳолда ўқитилади.

Бундан ташқари Абдулла Авлоний номидаги Педагогик маҳорат институти андозасида қурилаётган Жиззах вилояти педагогик маҳорат маркази биноси, қурилиш ишлари билан танишилди.

Марказда фаолият юритаётган 23 мингдан ортиқ ўқитувчилар, 4 мингдан ошиқ мактабгача таълим мутахассислари малакасини ошириш учун етарли моддий ва илмий имкониятларга эга бўлиши, асосий талаб сифатга қаратилиши кераклиги айтилди.

Жиззах вилоятида ўтказилган мулоқот, таълим тизимини янада такомиллаштириш ва ёш авлодга юқори сифатли таълим беришда янги босқични бошлаб беради албатта..

Тинчлик маҳалласида ҳам хотин-қизлар пиллачиликка қизиқиш билан ёндашмоқда. Нигора Қодирова ушбу фаолиятда илк қадамини ташлаб, 1 қути пилла билан тажриба орттирмоқда. Унинг сабр-тоқати ва меҳнати келгусида янада катта ютуқларга замин яратиши шубҳасиз. Шу маҳалладаги фаол хотин-қизлардан Манзура Шерматова эса қайнонасидан пиллачилик сирларини ўрганиб, бугун 4 қути пилла парваришлаб, оиласига муносиб даромад келтирмоқда. Тинчлик маҳалласидаги 120 та хонадонда 323 нафар хотин-қизлар 93 қути пилла парваришлаб, улкан меҳнат намунасини намоён этмоқда.

Бу рақамлар ортида ўзини аямасдан меҳнат қилаётган, оиласи учун кучи ва вақтини аямайдиган аёллар турибди. Улар нафaқат ўз оиласи, балки маҳалла ва туман иқтисодиётига ҳам улкан ҳисса қўшмоқда.

Арнасой аёллари — сабр-тоқат, меҳнат ва илҳом тимсоли. Уларнинг жасорати ва интилиши барчага ибрат. Улардан ўрнак олиб, янги авлод ҳам меҳнатга рағбатланиб бораётгани эса энг қувонарли жиҳатдир.