Tramp maʼmuriyati oxirgi paytda koʻpgina zararli, xavfli va gohida mantiqsiz koʻp qarorlarni qabul qilmoqda. Albatta bulardan hamma yaxshi xabardor boʻlsa kerak. Lekin kecha yaxshiroq gʻoya taklif qilishni ham boshlashibdi — investorlar uchun vizani 5 million dollarga chiqarishmoqchi ekan. Albatta agar qaysidir narx qoʻyilsa bu narsa yaxshi boʻlar edi, lekin maʼmuriyatni qarori mavjud qonunlardan ustun boʻla olmaydi, balki kongress bilan buni ustidan kelishib koʻradi. Menimcha bunday dasturlar albatta juda yaxshi. Lekin investitsiya talabidan koʻra — hukumatga naqd pul toʻlash talabi boʻlsa yaxshiroq boʻlar edi deb oʻylayman, qingʻir yoʻllar uchun imkoniyat kamroq va naqd pulni maʼmurchiligi oson. Demak bu vizalarni tez berish imkoni boʻladi. Uchinchidan, bunday vizalar soni cheklangan boʻlmasligi va boshqa umumiy kvotalarni ichiga tushib qolmasligi kerak. Toʻrtinchidan, narxini boshida sal pastroqdan boshlab, narxi orqali sonini nazorat qilib kelish kerak.
Lekin umuman aytganda, AQShdagi koʻp shunday “grin karta” berishlarni, odamlarni millati orqali emas, kvota va ehtimol orqali emas, masalan daromadi orqali qilsa yaxshiroq boʻlar edi. AQShda ayrim turdagi ishlash uchun ruxsatnomalarda, mehnat vazirligi bu kasb egasi qanchalik mamlakat uchun kerakligi kabi qogʻozlar qilib beradi. Osonroq yoʻli — daromadi orqali. Agar haqiqatdan juda kerakli malaka egasi boʻlsa — daromadi ham yuqoriroq boʻladi, shunda subyektiv koʻrsatkichlar emas, obyektiv koʻrsatkichlar orqali koʻp narsani hal qilsa boʻladi.
Buni hammasini yozyapman-u, lekin amaldagi maʼmuriyat bunday nyuanslarni ustida ishlashga ragʻbatlari yoʻq. Ertaga yangi shou qilishi kerak boʻladi. Immigratsiyani islohoti esa menimcha 2027 yilda majburlikdan qilinadi.
