Talabalar dardi: Biz texnik mutaxassis emas biotibbiyot sohasida ixtisoslashishni istaymiz!
Hurmatli Rasul Kusherbayev!
Biz, Toshkent tibbiyot akademiyasining Biotibbiyot muhandisligi (tibbiy bioinjeneriya) yo‘nalishi bo‘yicha ta'lim olayotgan talabalar sizga murojaat qilmoqdamiz.
Mazkur yo‘nalish 2021-yilda akademiyamizda tashkil etilgan bo‘lib, u nafaqat tibbiy asbob-uskunalar bilan ishlash, balki protezlash, tabiiy va sun'iy organlar yaratish, ekto-endo protezlar ishlab chiqish kabi ko‘plab ilg‘or texnologiyalarni o‘z ichiga olgandi.
Bundan tashqari, genetik injeneriya bo‘limlari ham ushbu yo‘nalishga kiritilgan edi. Biroq, bizning o‘quv jarayonimizga ta'sir qilgan o‘zgarishlar yuz berdi. 2021/2022-o‘quv yilida biz biologiya va kimyo fanlaridan imtihon topshirgan holda qabul qilingan edik. Ammo 2022/2023 o‘quv yilidan boshlab kirish imtihonlari o‘zgartirildi, ya'ni matematika va fizika fanlari joriy etildi.
Bu o‘zgarish o‘quv rejamizdagi bir qancha klinik fanlarning olib tashlanishiga olib keldi. Natijada, bizni faqat texnik jihatdan ishlovchi mutaxassislar sifatida tayyorlashga yo‘naltirildi, lekin bizning maqsadimiz nafaqat apparat tuzatish, balki biotibbiyot va tibbiyot sohasida chuqur bilimlarga ega bo‘lish edi.
Bizning 1-kursda tibbiy yo‘nalishlar bo‘yicha umumiy fanlarni o‘rganishimizga qaraganda, 2-kursning o‘rtalariga kelib, o‘quv rejamizda jiddiy o‘zgarishlar yuz berdi. Aynan shu davrda bizning ta'lim dasturimiz texnikaga ko‘proq e'tibor berishga o‘zgartirildi. Biz texnik mutaxassislar bo‘lishni maqsad qilganimiz yo‘q, biz biotibbiyot sohasida ixtisoslashishni istaymiz.
O‘qitilayotgan fanlar ham texnikaga bog‘liq bo‘lib qolganligi sababli, biz ko‘plab fundamental tibbiy fanlar bo‘yicha zarur bilimlarni o‘zlashtira olmayapmiz.
Biz, bu oliygohga faqat apparat tuzatish uchun emas, balki yuqori malakali biotibbiyot mutaxassisi, ya’ni radiolog, vrach-lobarant, genetik injeneriya, protezlash bo’yicha mutaxasis bo‘lish uchun kirgan edik. Afsuski, o‘quv dasturidagi o‘zgarishlar bizning maqsadlarimizga zid kelmoqda.
Shu sababli, 2024/2025-o‘quv yili bitiruvchilari uchun 2-mutaxassislik sifatida "Davolash ishi" fakultetida tahsil olishga ruxsat berishlarini yoki magistiratura ochib berishilarini iltimos qilamiz.
"Davolash ishi" fakultetida o‘qib kelgusida , Biotibbiyot muhandisligi yo‘nalishida olgan bilimlarimizni birlashtirgan holda yetuk mutaxasis bo‘lishga hamda tibbiyot sohasida raqamlashtirish, zamonaviy tibbiy uskunalardan keng foydalanishga o‘z xissamizni qo‘shishga vada beramiz.
Hurmat bilan,
TTA Biotibbiyot talabalari
👉 @Kusherbayevga_murojaat
