ХÆЛÆРТТÆ.
Уый уыдис фарон фæззæг. Æхсæвы баба йæхи срæвдз кодта цуаны цæуынмæ. Нæхицæй араст и боныцъæхтыл. Хур йæ был фæсхохæй сдардта, афтæ бахæццæ хъæды астæумæ. Æрлæууыд суадоны раз. Йæ цæст фæйнæрдæм ахаста, уазал суадонæй банызта æмæ йæхи æруагъта бæласы рæбын.
Йæ фæллад куы ауагъта баба, уæд фестад. Иæ хъустыл ауади къæцæлы къæрццытæ. Цуанон уайтагъд бамбæрста, уый сырд кæй у, уый.
Дыууæхстон топп æрцæттæ кодта. Арс æй ауыдта, йæ хъæлæсы дзаг ныббогъ ласта, йæхи уæлгоммæ аппæрста æмæ хъæрзы рынчын адæймаджы хуызæн. Сабыргай йæ раззаг къах батилы бабамæ. Цуанон сфæнд кодта арсы фервæзын кæнын. Карды фындз бахаста арсы дзæмбымæ, фæкъæртт æй кодта. Уайтагъд йæ дон фемæхсти. Зæгæлы йас каконсындз дзы сæппæрста. Ныссыгъдæг ын кодта йæ къах æмæ йæ бабаста. Арсы уым ныууагъта. Араст ис дарддæр. Хъæды кæронæй куы рахызт, уæд, фæстæмæ фæкаст æмæ ауыдта, арс йæ фæдыл кæй цæуы, уый. Цуанон æрлæууыд. Арс æй æрбаййæфта, æмæ иумæ хъæумæ æрфардæг сты.
#радзырд
