Хаёлдаги ишлар…
Яқинда бир дўстим савол бериб қолди: “Бектош, ўзи нима иш қилмагансан?”.
“Хаёлингга келган ҳар қандай ишни айт, мен шуни қилган бўлиб чиқаман”, дедим.
Ростан ҳам бизнесда турли соҳага бошимни суқиб кўрганман, бугун фейсбук уч йил олдин Чорбоғда “Илик” деган кафе очганимни эслатиб қолди, ростан ҳам шу жойларда ҳам кафе очган эканман, кейин уни дўстим Шуҳратга сотиб юбордим, кейин у ҳам яна сотиб юборди. Хуллас буни ҳам қилиб кўрганман, бу ҳаммаси қизиқишдан бўлган, албатта кафе очиб ресторатор бўлиб кетаман деб ўйламаганман, шунчаки қани бу бизнеснинг ичида нима бор экан деган қизиқиш мени шу йўналишда ҳам инвестиция қилиб кўришга чорлаган.
Тадбиркор инсонларнинг бошқа инсонлардан энг катта ажратиб турувчи характерини энди-энди тушуниб етяпман, у ҳам бўлса, “қани, нима бор экан, бир қилиб кўрайлик”, дея рискдан қўрқмаслигида ва ўша рискдан келадиган масъулиятни кўтара олишида. Ҳали хаёлимда жуда ҳам кўп ишлар бор, уларни амалга ошириш учун эса энергия тугаб қолмаслиги керак, атрофимда фақат энергия берувчи инсонлар бўлиши керак деб биламан. Шунинг учун ҳар қандай энергия сурувчи инсонлардан узоқроқ туришга ҳаракат қиламан, сизларга ҳам шуни тавсия қиламан.
@bektoshkhatamov
