🎖️👏Аҕа дойду Улуу сэриитин кыттыылааҕа Наум Трифонович Слепцов 101 сааһын туолла
Аҕа дойду Улуу сэриитин кыттыылааҕа Наум Трифонович Слепцов быйыл кулун тутар 8 күнүгэр 101 сааһын туолла. Таатта улууһун Чөркөөх нэһилиэгэр Күүнэй нэһилиэгэр төрөөбүтэ. 1945 сыллаахха аармыйаҕа ыҥырыллан, милитаристическай Японияны охторууга кыттыбыта.
Хайлар куорат иһин кыргыһыыларга Наум Слепцов дьоппуон аармыйата саба түһүүлэрин икки төгүл төттөрү туораппыта, ол иһин «Отличник пулеметчик» бойобуой бэлиэнэн наҕараадаламмыта.
Наум Слепцов 1950 сыллаахха демобилизация кэнниттэн олоҕун учуутал үлэтигэр анаабыта, Аллайыаха, Горнай, Чурапчы, Томпо уонна Таатта улуустарыгар учууталынан, дириэктэринэн үлэлээбитэ.
Наум Трифонович алта оҕо аҕата, 13 сиэн, аҕыс хос сиэн эһэтэ буолар. Аҕа дойдуну көмүскээччи күнүн көрсө, СӨ баһылыга Айсен Николаев Аҕа дойду Улуу сэриитин атын кыттыылаахтарын кытта «СӨ Бочуоттаах гражданина» ааты иҥэрдэ.
Наум Слепцов кэргэнинээн Сэбиэскэй Сойуус Дьоруойа Федор Матвеевич Охлопков кэриэһин үйэтитиигэ көхтөөхтүк кытталлар. Кини олоҕун туһунан элбэх архыып матырыйаалын хомуйан, кинигэ таһааран, быыстапкалары тэрийбиттэрэ. Өрөспүүбүлүкэҕэ Охлопков аатынан бастакы түмэл аһыллыбыта, ол кэнниттэн краеведческай музей буолбута.
Наум Трифонович эмиэ РСФСР спордун бэтэрээнэ. Кини спорт алта көрүҥэр бастакы миэстэлээх, ол иһигэр саахымат, хайыһар, сүүрүү. 96 сааһыгар саахымакка спорт маастарыгар хандьыдаат буолбута уонна бэйэтин турнирдарын сыллата ыытар.
Байыаннай сулууспатын иһин Наум Трифонович Аҕа дойду сэриитин II истиэпэннээх уордьанынан наҕараадаламмыта.
@nvk_sakha
