Biz bolajon xalq emasmiz!
Ehtimol, qachonlardir shunday boʻlgandirmiz, balki.
Taxminimcha, bu Temur bobo yashagan davrlarga toʻgʻri kelsa kerak.
Chunki bolani sevmay, asrab-avaylamay turib kuchli davlat qurib boʻlmaydi, Bobomiz qurgan davlatga qarab shunday xulosaga kelaman.
Ijara uydagi yon qoʻshnimizning uyidan deyarli har oqshom 2 yoshli bolasiga qarab "ovozing oʻchgur", "iflos, jonimga tegding" yoki "nega tugʻgan ekanman sani", degan mashhur iborani juda koʻp eshitaman.
Ba'zan koʻchalarda ham hali oyogʻi chiqmagan bolasiga oʻshqirayotgan, hatto urayotgan ayollarga duch kelamiz.
Sizga savol:
Birorta nemis, ingliz, yahudiy yo boʻlmasam oʻzimizda yashayotgan rus yo kareys millatiga mansub odamlarning shunday qilganini koʻrganmisiz?
Biz qanaqasiga bolajon xalqmiz? bogʻchadagi bolani urib oʻldirgan xalq bolajon boʻladimi?
Endi "bolani sevmay kuchli davlat qurib boʻlmaydi", degan gapga qaytsak. Ota-onasidan tinimsiz haqorat eshitib, kaltak yeb oʻsgan bola kim boʻladi kelajakda?
Toʻppa-toʻgʻri!
Alamzada, oʻzidan boshqani oʻylamaydigan, qahri qattiq johil yoki oʻziga ishonmagan dovdir, qoʻrqoq, mudom yetakda yuragigan, shaxsiy fikriga ega boʻlmagan odam boʻlib yetishadi.
Masalaning eng nozik tomoni shundaki, mana shu avlodning ichidan yangi Sudyalar, vazirlar, xullas "katta odamlar" chiqadi.
Keyin nima boʻlishini esa juda yaxshi bilasiz.
Gapning loʻndasi, BIZ BOLAJON XALQ EMASMIZ.
Toʻgʻri, birovning bolasiga bu muomalamizni koʻrsatishdan uyalarmiz, lekin oʻz bolamiz oldida doim "mehr"imiz joʻshib ketadi.
Oʻtmishni aytib, Xalqlar doʻstligi oldida turgan, Shomahmudovlar haykalini koʻrsatib, "Toshkent — non shahri" degan filmlarimiz bilan hadeb maqtanavermay, muommoni tan olib, yechim topishimiz kerak.
Aks holda, metandagi turnaqator navbatlarni esga tushiruvchi poraxoʻrliklar, qashshoqlik, ekologik muommolar hech qachon tugamaydi va hech qachon, hech narsa yaxshi tomonga oʻzgarmaydi.
Ravshan Haqmurod
@Ravshan_Haqmurod
