👆👆👆👆 аввалги қисмлар
#ҚАСД
8-ҚИСМ
Ёрқиной эди...
Гарчи Ёрқиной Козим акасининг маслаҳати билан қизиқ устида Райҳона ва Алиларининг тўйларига розилик билдирган бўлса-да, кўп ўтмай ўз фикридан қайтиб, "айниб" қолганди.
"Бекор қилдим ,- дея жизғанак бўла бошлаганди у пушаймонлик ўти аъзойи баданини куйдира бошлагач,- қиз қўл остимда бўлгандагина барча иш назоратимда бўларди . Райҳонани узатиб юборсам, у учирма бўлган полапондек қўл остимдан чиқиб кетади. Кейин ундан "қутилишим" янада қийинлашади. Қандай бўлмасин бу хатони тузатишим шарт. Ахир айтишади- ку , касалликни даволагандан кўра олдини олган осон деб" . Ёрқиной шу тўхтамга келди- ю , унаштирув Алининг келинойисидан олиб қолган телефон рақамига қўнғироқ қилди :
- Алло , - деди у овозига сохта меҳрдан мўл- кўл жойлашга ҳаракат қилиб,- Алихон , ўғлим бу сизмисиз ?
Тармоқдан "Ҳаа, мен Алиман, эшитаман, ким эди бу? " деган товуши эшилди.
- Мен , бу мен Ёрқиной опангизман, Райҳонанинг аячаси ,- деди Ёрқиной Али ҳам ўзини опа дея чақиришини ҳоҳлаши ва ҳали унчалик ҳам ёши ўтиб қолмаганлигини алоҳида таъкидлашга интилганча,- узр сизни Райҳонага тегишли бир масалада безовта қилаётувдим, вақтингиз бемалол бўлса мени эшита оласизми ?
Шундоқ ҳам ўртага Райҳона исми қўшилгач , бутун вужуди қулоққа айланган Али учун вақт ажратиш тўғрисидаги таъкидлашлар ортиқча эди :
- Гапираверинг , опа ,-деди Али беихтиёр Ёрқинойни аёлнинг ўзи истаганидек опа деб чақириб ,- сизни эшитиш учун вақт топилмаса ҳам топилади.
- Раҳмат ,- дея йигитни мулойимлик билан ўрай бошлади Ёрқиной,- тушунган йигит эканлигингизни бир кўришда билгандим , шу сабаб кечадан буён сизга нисбатан ноҳақлик қилмаяпмиканман деган хаёл мени эзиб ташлаяпти.
- Тушунтириброқ гапиринг ,илтимос ,- Алининг овозида ялиниш оҳангидан кўра қатъият сезилди
- "Ууух , мужик, - дея ўйлади Ёрқиной кўнгли алланечук бўлиб ,- йигитмисан, йигит экан- да бу Али деганлари. Ҳар икки гапининг бирида "Ҳммм, хоооп бўлади" дейдиган мулойимсупирги , сўтақўзиларни кўришга кўзим йўқ" . Ёрқиной шундай деб ўйлаганча "дангалчига дангал" қабилида Алига айтмоқчи бўлган гапининг пўсткалласини айтиб қўяқолди :
- Алихон , шу десангиз ҳар қандай савдода ҳалол,лик бош омил бўлиши керак. Бўлмаса жавоби икки дунёда оғир келиши аниқ. Сотувчи сотадиган молини айбини айтиб сотмаса савдоси бекор. Олувчи ҳам олаётган молини нуқсонини билиши олди - соттининг энг биринчи талаби эканлиги аниқ. Билгандан сўнг ўша молни оладими ёки йўқми бу ўзининг ҳоҳиши. Юқорида айтганларим умр савдосига ҳам тегишлидир. Мана куни кеча сиз билан Райҳонанинг унаштирувини ўтказдик. Аммо билишингиз керак бўлган энг муҳим гап сизларга айтилмай , маълум қилинмай қолиб кетди.
Хуллас ... Райҳона касал... Тузалмас дардга чалинган . Юраги туфайли кунларини ташқарига чиқмай дориларга тўлган хонасида ўтказиб келади. Шифокорлар ҳам қанчадан қанча сарф- ҳаражат қилишимизга қарамай кўнгил учун бўлса-да бирорта умидлантирадиган сўз айтишиётганлиги йўқ. Топган гаплари : Қўлимиздан келганини қиляпмиз - бу ёғи Аллоҳдан.
Сўзларимдан тушунгандирсиз . Уят бўлса ҳам айтаман. Райҳона нафақат оталик бахтига мушарраф қилиб сизни ҳурсанд қилолмайди , балки кези келганда энг оддий юмуш бўлган бир чойнак чойингизни дамлаб беришгаям ярай олмайди,- Ёрқиной асосий гапни гапириб бўлиб , давомига тилёғламалик қилишга тушди ,- менга бор ҳақиқатни айтиш осон деб ўйламанг. Шу гапларни айтгунимча етти қават теримдан шилиниб тушдим. Мана барча гапдан хабардор бўлдингиз. Энди қандай қарорга келишингизни кутамиз . Аммо олдиндан айтиб қўяй , қарорингиз қандай бўлишидан қатъий назар хафа бўлиш йўқ.
@Xazon_Rezgi / 26
