Merz (သို့) U.S ကို အာခံသူ
*******
“ဥရောပကို ပိုအားကောင်းအောင် လုပ်ပြီး အမေရိကန်ရဲ့ အထောက်အပံ့ကနေ ကင်းလွတ်တဲ့ လွတ်လပ်တဲ့ ဒေသဖြစ်အောင် လုပ်မယ်။”
ဒီစကားကို ပြောလိုက်သူကတော့ မနေ့က ဂျာမနီရွေးကောက်ပွဲမှာ အနိုင်ရခဲ့ပြီး ဂျာမနီအဓိပတိဖြစ်လာမယ့် Merz ပါပဲ။ သူဟာ ပူတင်နဲ့ ရုရှားကို မုန်းတီးသလို Trump နဲ့ Elon Musk တို့အဖွဲ့ကိုလည်း အင်မတန်ရွံရှာပါတယ်။ ရွေးကောက်ပွဲနိုင်ပြီးပြီးချင်း နိုင်ငံကို ပြောကြားတဲ့ မိန့်ခွန်းမှာ Trump နဲ့ Musk တို့ရဲ့ ဂျာမနီရွေးကောက်ပွဲကို ဝင်နှောင့်ယှက်တာဟာ စိတ်ပျက်စရာကောင်းပြီး ရုရှားလိုပဲ ကျင့်ဝတ်မရှိဘူးလို့ ပေါ်တင်ဝေဖန်လိုက်ပါတယ်။ ဒါ့အပြင် ဥရောပမှာ စစ်အင်အားတွေ တိုးချဲ့ပြီး အမေရိကန်ရဲ့ အထောက်အပံ့ကို စောင့်နေစရာမလိုပဲ ကိုယ့်လွတ်လပ်ရေးကို အာမခံနိုင်တဲ့ အဆင့်ထိ အားကောင်းအောင် လုပ်ကြဖို့လည်း ပြောသွားပါတယ်။
Elon Musk အကြီးအကျယ် မဲဆွယ်ပေးခဲ့တဲ့ AfD ပါတီကတော့ ရှုံးနိမ့်သွားခဲ့ပါတယ်။ ၈၀% သော ဂျာမနီတွေဟာ အဲဒီပါတီနိုင်သွားမှာစိုးလို့ မဲထွက်ပေးခဲ့ကြပါတယ်။ ဂျာမနီအဓိပတိ Merz ဟာ အစိုးရအဖွဲ့ကို အလျင်အမြန်ဖွဲ့စည်းမှာဖြစ်ပြီး မကြာခင် ဥရောပခေါင်းဆောင်တွေနဲ့ တိုင်ပင်ပြီး ယူကရိန်းကို ကူညီဖို့ လုပ်မယ်လို့ ပြောကြားသွားပါတယ်။ ရုရှားနဲ့ ငြိမ်းချမ်းရေးလုပ်လို့ မရဘူး။ တကယ်ငြိမ်းချမ်းရေးရချင်ရင် ကျနော်တို့ဟာ မှန်ကန်တဲ့ဘက်က ရပ်တည်ရမယ်။ ကျနော်ကတော့ အမြဲတမ်း ယူကရိန်းနဲ့ အတူရှိတယ်လို့ ပြောကြားသွားပါသေးတယ်။ သူဟာ ယူကရိန်းဘက်က အမြဲထောက်ခံခဲ့သူဖြစ်ပြီး သမ္မတဇာလန်းစကီးကိုလည်း အားပေးသူဖြစ်ပါတယ်။
Trump ကတော့ ရွေးကောက်ပွဲအနိုင်ရတဲ့ Merz ကို ဝမ်းသာကြောင်းပြောခဲ့ပေမယ့် Merz ကတော့ တုံ့ပြန်ခြင်းမပြုခဲ့ပါဘူး။ EU မှာ ခေါင်းဆောင်က ဂျာမနီပါပဲ။ ကမ္ဘာ့စီးပွားရေးမှာ အဆင့် ၄ မှာရှိပြီး ဂျာမနီစစ်တပ်ရဲ့ လက်နက်တွေဟာ ထိပ်တန်းပါ။ လက်ရှိဂျာမနီအဓိပတိဖြစ်တဲ့ Scholz ဟာ Biden တို့လိုပဲ အရာရာကို ထိန်းထိန်းသိမ်းသိမ်းလုပ်ပေမယ့် Merz ကတော့ ပြတ်သားတဲ့ သူမျိုးပါ။ သူက Scholz ယူကရိန်းကို ပေးဖို့ ငြင်းခဲ့တဲ့ Taurus ဒုံးကျည်တွေကို အခုတော့ ယူကရိန်းကို ပေးမယ်လို့ ပြောခဲ့သူဖြစ်ပြီး ရုရှားနိုင်ငံထဲထိ ထိရောက်အောင် ပစ်နိုင်မှ ဒီစစ်ပွဲက အမြန်ပြီးမယ်လို့ ခံယူထားသူလည်း ဖြစ်ပါတယ်။ ဒါ့အပြင် ယူကရိန်းစစ်ပွဲ ငြိမ်းချမ်းရေးသဘောတူညီချက်မှာ ဥရောပနိုင်ငံတွေ ပါဝင်ရမယ်လို့ ပြတ်သားတဲ့ ဆုံးဖြတ်ချက်ရှိသူဖြစ်ပြီး Trump ရဲ့ ရုရှားနဲ့ စာချုပ်ကို လက်ခံမှာ မဟုတ်ဘူးလို့ သူက ပြောထားပါတယ်။
မတ်လ ၃ ရက်နေ့မှာ ပြင်သစ်မှာ ဥရောပထိပ်တန်းခေါင်းဆောင်တွေ ထပ်မံဆုံတွေ့ဖို့ ရှိပါတယ်။ Trump ရဲ့ ရုရှားဘက်ပင်းတဲ့ မူဝါဒကြောင့် ဥရောပဟာ နိုးထလာပြီဖြစ်ပြီး ဥရောပစစ်တပ်တခုဖွဲ့ဖို့နဲ့ ယူကရိန်းစစ်ပွဲငြိမ်းချမ်းရေးကို သူတို့မပါပဲ ဆွေးနွေးခွင့်မရှိအောင် ပြုလုပ်မယ့်အကြောင်းတွေ ပါဝင်ပါတယ်။ ဥရောပဟာ စီးပွားရေးစူပါပါဝါပြန်ဖြစ်ဖို့နဲ့ စစ်ရေးစွမ်းအားမြှင့်တင်ဖို့ လုပ်တော့မယ်ဆိုရင် သူတို့ရဲ့ ခေါင်းဆောင်ဖြစ်တဲ့ ဂျာမနီက အရေးအကြီးဆုံးဖြစ်ပါတယ်။ ဥရောပကသာ ဒုတိယကမ္ဘာစစ်မတိုင်မီက အခြေအနေမျိုးထိ ပြန်သွားနိုင်မယ်ဆိုရင် အမေရိကန်ရဲ့ Global Power ကျဆင်းသွားမှာ ဖြစ်ပါတယ်။ ဥရောပဟာ လက်ရှိမှာ ကနေဒါနဲ့ တရုတ်ကို တိုက်ရိုက်ကုန်သွယ်ဖို့လည်း စဉ်းစားနေသလို စစ်ရေးစွမ်းရည်ကိုလည်း အစွမ်းကုန်မြှင့်ဖို့ ပြင်ဆင်နေချိန်မှာ Trump ကို ရဲရဲအာခံရဲတဲ့ Merz တက်လာတာဟာ ဥရောပအတွက်တော့ မျှော်လင့်စရာပါပဲ။
တခါက အင်မတန်ကြီးကျယ်တဲ့ ရောမအင်ပါယာကြီးကို အာခံသူ Spartacus ပေါ်ထွက်လာခဲ့သလိုပဲ အခုလည်း Trump နဲ့ အမေရိကန်ကို အာခံရဲတဲ့ သူတယောက်ကတော့ EU ရဲ့ ခေါင်းဆောင်နိုင်ငံကြီးဆီမှာ ပေါ်ထွက်လာခဲ့ပါပြီ။ ကမ္ဘာကြီးရဲ့ World Order ဟာ ဘယ်ဘက်ကို ယိမ်းသွားမလဲ။ ၄ နှစ်အကြာမှာ ဘယ်သူတွေ ပျက်ဆီးပြီး ဘယ်သူတွေ တိုးတက်ရစ်မလဲဆိုတာ ဆက်လက်စောင့်ကြည့်ကြပါစို့။
Nay Thway
