Marketingni sotish deb bilganlar, oxirida o‘zini ham sotadi
Dinfurushlik qilish niyatim yo‘q. Ammo e’tirof qilay: bugungi kunda biznesdagi ko‘p harakatlar – halollik bilan emas, “va'da”lar bilan yurayapti. Garchi ba’zilari buni “realistik yondashuv” deb hisoblasada, aslida bu – shaytoniy hissiyotga ruxsat berishdan boshqa narsa emas.
Ko‘p yillik tajriba shuni ko‘rsatdi:
loyiha olish jarayonida va’da berish — odatiy holga aylangan.
Ammo bu va’dalar — ba’zida mutlaqo amalga oshmaydigan, “ertak”dan iborat skriptlarga aylanib qolgan.
— “Biz sizga 10 kunda 1000 mijoz olib beramiz!”
— “Google’da 1-o‘ringa chiqasiz!”
— “Brendingizni bozorda TOP qilamiz!”
Yaxshi, bularning hammasi quloqqa yoqimli, lekin ularning orqasida:
— na marketing strategiyasi,
— na byudjetga reja,
— na mijozda tushuncha bor.
Va eng qizig‘i: bu va’dalarni eshitib, biznes egalari ham shunga monand harakat qiladi.
— “Men reklama uchun alohida pul ajratolmayman”
— “Kontentga byudjet yo‘q, o‘zim telefonda suratga olaman”
— “Kompaniyada ichki tizim yo‘q, lekin marketingdan zo‘r natija kutamiz”
Va oxirida nima bo‘ladi? Marketing ishlamaydi. Natija bo‘lmaydi.
Aybdor? Albatta, marketingchi yoki agentlik. E’tirof yo‘q, tushuncha yo‘q, sharoit yo‘q — lekin talab baland.
Shu jarayon natijasida ko‘pchilik marketingchilar nima qiladi? Ularga moslashadi. Ha, ochiq aytaman:
— Qancha ko‘p yolg‘on va’da bersa,
— Qancha ko‘p psixologik manipulyatsiya qilsa, shuncha ko‘p loyiha oladi.
Lekin bu – sifatli marketing emas.
Bu — shaytoniy marketing. Foyda ko‘rinadi, lekin qadriyat yo‘qoladi.
“Marketing” degani bugun ko‘p joyda faqat sotuv deb tushuniladi.
Brendmi? PRmi? Auditoriya bilan ishonchli aloqa o‘rnatishmi? Baraka topsin, hech kim buni eshitmayapti.
Fikr yuritishimiz kerak.
Foyda pul ustiga qurilsa ham, u qiymat ustiga chiqishi kerak.
Marketing — bu yondashuv, bu sistemalashgan fikrlash, bu mijozga xizmat koʻrsatish san’ati boʻlishi kerak. Kimdir yana buni "real hayotda bu ishlamaydi" deb o‘ylashi mumkin. Balki sizning real hayotingizda emasdir.
Lekin o‘z qadriyatiga sodiq, to‘g‘ri ishlagan bizneslar bor. Ular barakali ishlayapti. Ular marketingni — pul emas, odamlar orasidagi ko‘prik sifatida ishlatyapti. Shuning uchun o‘sayapti.
Yolg‘on va’dalar — vaqtincha foyda keltiradi. Ammo bu — o‘z nomingni yerga uradigan yo‘l.
Kimligingizni esdan chiqarmang. Ishingiz — reklama emas, PR emas, yoki shunchaki sotuv emas. Sizning ishingiz — ishonch qozonish.
Va shuni unutmangki: “Marketing” bu — mijozni yutib olish emas. Bu — mijozni kutib olish san’ati.
✅@ashinaqa_gaplar
