Шавкат Умурзоқов Тошкент шаҳар ҳокимлигига раҳбар бўлиб келганига 23 март куни икки йил бўлди. Халққа қарийб кўриниш бермайдиган ҳоким жаноби олийларининг фаолияти ҳам, назаримизда, тузукроқ натижа кўрсатгани йўқ.
Аввало, халқ билан мулоқот, ОАВ ва жамоатчиликка ҳисобдорлик Тошкент шаҳрида йўқолиб кетди. Маҳаллий депутатларга ҳисоб бериш, улар билан бамаслаҳат иш тутиш ўтмишга айланди. Бу орган ҳокимга керакли ҳужжатни тасдиқлаб турса бўлди. Тошкент шаҳар ҳокимлиги ҳужжатларининг жамоатчиликка эълон қилинганидан кўра яширилгани кўпайди. Тошкент янги даврнинг энг ёпиқ ҳокимлигига айланди.
Тошкент йўллари, инфраструктураси Ортиқхўжаев давридаги қилинган ишлар билан бугунга яраб турибди. Яқинда ўтказилган “яма”ларни ямаш бўйича умумтошкент акцияси худдики пойтахт йўлларини қайта қургандек қилиб кўрсатилди. Жамоат транспортини сақлаш ва ривожлантириш, пиёдаларга шароит яратиш аллақачон бошқа вазирлик ва ташкилотлар ишига айланган.
Тошкент экологияси ёмон бўлса бўлдики яхшиланмади. Қиш келдики шаҳарни қора тутун қоплаяпти, иссиқда ҳам, совуқда ҳам нафас олиш хавфли бўлиб бормоқда. Жамоат парклари эса хусусий қўлларга ўтиб, темир-терсак тўпламига айланиб, борган сари қисқариб кетмоқда.
Тадбиркор, кичик бизнес ҳокимликнинг “тартибга солиш” ташаббуслари қурбонига айланяпти. Кичкина мисол. Тадбиркорлик субъектларининг енгил конструкцияли ёппасига, ваҳшийларча бузилди, ваҳоланки, бошқа ечим топса ҳам бўлар эди. Яқин кунларда бекатларни қайта сотиш кампаниясига старт беришмоқчи. Ҳокимлик ўзича қонунни пеш қилиб олган бўлса-да, одамлар анойи эмас, кўриб турибди, бу жойлар яна сотилади. Хусусий мулк ҳимояси, тадбиркорлар ишончи ҳақида гапиришдан эса маъно йўқ.
Тошкент жонли. Пойтахтнинг энг катта ресурси унинг аҳолиси. Ҳокимлик эса одамлар билан эмас, бошқа нарсалар билан овора. Нима билан овора, худо билади. Иши режадан режагача, тақдимотдан тақдимотгача гўёки. Амалда ҳечвақо, қуруқ гап.
