NEKBINLIK BALOSI
Musulmon sifatida eng katta muammolarimizdan biri — rajo (umid) hissiga haddan ziyod berilib qolganimizdir. Xushxabar beruvchi oyat-hadislar qalbimizni ekzistensial nuqtai nazardan tinchlantirib, xotirjam qilib qo‘ygan. Go‘yoki, Allohga iymon keltirish va besh farzni ado etish bilan oxirat uchun belgilangan "minimal talablarni" bajargandekmiz. Bu soxta xotirjamlik esa ko‘pincha bizni loqaydlik va passivlik sari yetaklaydi.
Lekin shunday xotirjamlik uchun asos bormi?
Qur'oni Karimda o‘z vazifasini bajarmagan qavmlarning boshqa qavmlar bilan almashtirilishi haqida ogohlantiriladi:
"Va agar yuz o‘girsangiz, sizdan boshqa qavmni o‘rningizga keltirur, ular esa sizlarga o‘xshagan bo‘lmaslar" (Muhammad surasi, 38-oyat).
"Robbim o‘rningizga sizdan boshqa qavmni keltiradi" (Hud surasi, 57-oyat).
"Sizlardan kim dinidan qaytsa, Alloh, albatta, O‘zi sevadigan va ular ham Uni sevadigan qavmni keltiradi" (Moida surasi, 54-oyat).
Bu ogohlantirishlar aynan bizga qaratilgan bo‘lishi mumkin. Agar musulmonlar sifatida o‘z zimmamizdagi vazifalarni anglab, jiddiy harakat qilmasak, biz ham tarix sahnasidan chetga surilib, o‘rnimizni boshqa qavmlar egallashi mumkin. Umidbaxsh xabarlar ham aynan ularga atalgan bo'lsa, ehtimol.
Shunday ekan, musulmon uchun bu dunyo — sinov maydonidir. Bu sinovdan faqat namoz-u ro‘zamiz bilan emas, balki faoliyatimiz, intilishimiz va ijtimoiy mas'uliyatimiz orqali muvaffaqiyatli o‘tishimiz lozim. Bugun jamoat sifatidagi o'zligimizga erishmas ekanmiz, jannatga kirishimizga bo‘lgan umid biz uchun xatarli xotirjamlik va shaytoniy vasvasaga aylanishi muqarrar.
Bugun dunyoda musulmonlarning boshida shafqatsiz zulmlar, adolatsizliklar mavjud ekan, passiv "mo'minligimiz" bilan xotirjam bo'lishga haqqimiz yo'q.
Soddalarcha nekbinlik bilangina saodatga erisha olmaymiz. G'aflatda qolmasligimiz, hushyor bo'lishimiz lozim.
@ufq_horizon
