Buxoro viloyati bojxona boshqarmasi boshlig‘i B. Muratov jahon bozorida o‘z o‘rnini topishga intilayotgan korxonalar faoliyatini o‘rganish maqsadida sayyor uchrashuv o`tkazdi.
“SD TURKMEN HALY” gilam markazi nafaqat qo‘lda tayyorlanadigan noyob gilamlari, balki milliy an’analarni aks ettiruvchi muzeyi bilan ham ko‘plab sayyohlarni o‘ziga jalb etmoqda.
Bojxona organi mas`ullari ushbu maskanda sayyor o`rganishlar olib borish barobarida, tayyor mahsulotlarini AQSh ga eksport qilishni rejalashtirayotgan korxona vakillariga “Eksport uch qadamda” tizimining afzalliklari haqida batafsil ma`lumot berishdi.
Muloqot jarayonida tadbirkor, faoliyatini yanada kengaytirish maqsadida qo`shimcha asbob-uskunalar xarid qilish niyatida ekanligini bildirdi. Bu jarayonda albatta, bojxona xodimlari korxonaga zarur huquqiy va amaliy yordam ko‘rsatishga tayyor ekanliklarini ta`kidlashdi.
Ma`lumot o`rnida aytadigan bo`lsak, ushbu markazda 70 ga yaqin xotin-qizlar doimiy ish bilan ta’minlangan. Kelgusida korxonaga yangi tenikalarning olib kelinishi ishchilar sonini 200 nafarga yetkazish imkonini beradi.
Xulosa qilib aytganda, o‘zbek-turkman do‘stligining yorqin namunasiga aylangan ushbu maskanda nafaqat betakror gilamlar yaratilmoqda, balki ikki xalq o‘rtasidagi mushtarak tarix va madaniyat milliy muzey orqali sayyohlarga namoyish etilmoqda.
