Jismoniy va mulkiy zarar yetkazgan holda qilingan har qanday samosudning oqibati juda yomon
Radarlarga qarshi o‘zboshimchalik bilan urush ochgan shaxs hech qanaqa zamonamiz qahramoni emas. U eng avvalo qoidabuzar, yo‘l harakati xavfsizligi qoidalariga rioya qilmagan. O‘zi tartibli yurishni o‘rganish o‘rniga, alamini radarlardan olmoqchi bo‘lgan va samosudga yo‘l qo‘ygan. Buni hech qanaqa sabab yoki bahona bilan oqlab bo‘lmaydi.
Masalan, bir kishi har safar taqiqlangan joyga, shundoq yo‘l yoqasiga, chiqindi tashlab ketar edi. Oxiri o‘sha yerga kamera o‘rnatishdi va chiqindi tashlaganlarni jarimaga tortish boshlandi. Haligi qoidabuzar yana ko‘chaga chiqindi tashlashda davom etdi hamda jarima to‘lagani uchun kameralarni urib sindirdi. Nima qilish kerak, uni ham oqlash kerakmi? U qahramonmi? Qaysi ishi uchun? Qoidalarga bo‘ysunmagani uchunmi yoki o‘zboshimchalik bilan mulkka zarar yetkazgani uchunmi? Vaholanki, ko‘chaga chiqindi tashlash bevosita odam o‘ldirmaydi, lekin yo‘l qoidalari buzilishi sababli har yili 2 mingdan oshiq yurtdoshimiz halok bo‘lmoqda.
Unaqada keyingi bosqichda hadeb qo‘lga tushavergani uchun kameralarni sindirgan o‘g‘rilarni ham oqlashni boshlaymizmi?
Har qanday norozilikni qonun doirasida bildirish kerak. Agar radarlarni noto‘g‘ri deb o‘ylasangiz, unda bunga qarshi qonuniy yo‘l bilan kurashing. Lekin zinhor o‘zboshimchalik bilan emas. Davlat bunga yo‘l qo‘yib bersa, ertaga xaos boshlanadi, istalgan inson bironta yoqmagan odamining o‘ziga yoki mulkiga zarar yetkazishni boshlaydi. Bu har birimiz uchun xavf.
Agar o‘sha inson radarlar yomonligi haqida ijtimoiy tarmoqlar orqali tanqidiy fikr bildirganda edi, garchi uning gaplariga qo‘shilmasam ham, lekin unga fikri uchun bosimlar bo‘lsa, himoya qilgan bo‘lardim. Xuddi “metan zapravka”dagi haydovchi holatidagi kabi. Chunki tanqidiy fikr aytish jinoyat emas, so‘z erkinligi Konstitutsiya bilan kafolatlangan.
Ammo birovning mulkiga zarar yetkazish — qonunlarga zid.
Bo‘lgan ishdan esa na haydovchilarga, na boshqa yurtdoshlarimizga manfaat tegadi. Bir tiyinlik foydasi yo‘q. Asosiy jabrni o‘sha insonning o‘zi ko‘radi endi, qonun oldida javob berishga majbur bo‘ladi.
👉 @xushnudbek 👈
