နေပြည်တော်က၊ ပွဲများမှသည်
--------------
(၂၆-၃-၂၀၂၇)
နစက ဥက္ကဌရဲ့ ရုရှား-ဘယ်လာရုစ် ခရီးစဉ်တွေပြီးကတည်းက သတိထားမိတာတစ်ခုက နေပြည်တော်မှာ လုပ်နေတဲ့ ပွဲတွေပဲ။ Beyond 2025 Forum , Peace Talk, အမျိုးသားစီမံကိန်းကော်မရှင် အစည်းအဝေး, ဘဏ္ဍာရေးကော်မရှင် အစည်းအဝေး၊ ကမ္ဘာ့ရေနေ့ အထိန်းအမှတ်အခမ်းအနား၊ ဖွဲ့စည်းပုံအခြေခံဥပဒေဆိုင်ရာ အစည်းအဝေး စသဖြင့် ပွဲတွေအများကြီး နေပြည်တော်မှာ ပြုလုပ်နေတယ်။
ပုံမှန်လုပ်နေကျ အစည်းအဝေးတွေကို မပြောလိုပေမယ့် ၂၀၂၅ အလွန်ဆိုတဲ့ ကမ္ဘာ့အရေး၊ မြန်မာ့အရေးကို နိုင်ငံတကာက ပညာရှင်တွေ သုံးသပ်ဆွေးနွေးကြတဲ့ပွဲမှာ တရုတ်၊ ရုရှား၊ ဂျပန်နဲ့ အိန္ဒိယနိုင်ငံတွေက နိုင်ငံရေး၊ စီးပွားရေးပညာရှင်တွေ တက်ရောက်ဆွေးနွေးခဲ့ကြသလို တစ်ချို့ပညာရှင်တွေက အင်တာနက်ကနေ ဆွေးနွေးပေးတာကိုလည်း မြင်ရတွေ့ရပါတယ်။
အဲ့ဒီပွဲနဲ့တစ်ဆက်တည်းလုပ်ခဲ့တာကတော့ ငြိမ်းချမ်းရေးစကားဝိုင်း ပါပဲ။ EAO အဖွဲ့တွေ၊ နိုင်ငံရေးပါတီတွေနဲ့ NSPNC အဖွဲ့ တွေ သုံးပွင့်ဆိုင်ပြီး ဆွေးနွေးကြတယ်ပေါ့ဗျာ။
ဒီပွဲတွေဟာ မြန်မာနိုင်ငံအတွက် ဘာတွေအကျိုးရှိသွားလဲလို့ မေးခွန်းထုတ်ကြတာမျိုးတွေရှိပါတယ်။ တိုက်ရိုက် အကျိုးသက်ရောက်မှုကတော့ ပွဲတက်ကြတဲ့ လူငယ်တစ်ချို့ ဗဟုသုတအနည်းငယ်ရသွားတာက လွဲရင် မရှိဘူးပေါ့ဗျာ။ ဒီအတွက်လည်း တစ်ချို့လူတွေ အပြစ်တင်ကောင်းတင်ကြမှာပေါ့။
သို့သော်လည်း ကျွန်တော့တစ်ဦးတည်းအမြင်မှာ နစကဟာ ရုရှား-ဘယ်လာရုစ် ချစ်ကြည်ရေးခရီးစဉ်တွေအပြီး သူ့ရဲ့ တရားဝင်မှု Legitimacy ကို တစ်ကမ္ဘာလုံးအသိအမှတ်ပြုခံရဖို့ ဆွဲထုတ်ပေးနေတဲ့ ပွဲတွေလို့ ဆိုချင်ပါတယ်။
မြန်မာ့အရေးအခင်းကြီး စတင်ခဲ့ကတည်းက အနောက်အားပေးမီဒီယာတစ်ချို့ကြောင့် မြန်မာနိုင်ငံမှာ NUG ကို စင်ပြိုင်အစိုးရလိုလို၊ တရားဝင်အစိုးရလိုလို ထင်ယောင်ထင်မှားဖြစ်နေကြတဲ့ ကမ္ဘာကြီးကို ဘယ်သူကျား/ဘယ်သူနွားလဲဆိုတာ ကွဲပြားသွားစေမယ့်ပွဲတွေပါ။
တပ်မတော်နေ့ကတော့ တပ်က နှစ်တိုင်းလုပ်နေတာမို့ ထားလိုက်တော့။ အဲ့ဒီ နပတ ကပွဲတွေပြီးသွားရင် ဘင်္ဂလားပင်လယ်အော်ကနိုင်ငံတွေ စုပေါင်းပါဝင်တဲ့ BIMSTEC အစည်းအဝေးကို ထိုင်းမှာ လုပ်မယ်။ အဲ့ဒီပွဲကို နစက ဥက္ကဌ တက်မယ်ကြားတယ်။ ဒါဟာ အာဆီယံနိုင်ငံတွေဆီကို ၂၀၂၁ ပြီးကတည်းက လေးနှစ်အတွင်း ပထမဆုံးအကြိမ် သွားမယ့်ခရီးစဉ်ဖြစ်တဲ့အတွက် နစကရဲ့ တရားဝင်မှုကို ကမ္ဘာကို ပြပေးဦးမယ့်ပွဲဖြစ်လာလိမ့်ဦးမယ်။
ပြီးရင် မေလမှာ လုပ်မယ့် ရုရှားအောင်ပွဲနေ့၊ နစက ဥက္ကဌကို သမ္မတ ပူတင်က တရားဝင်ဖိတ်ကြားထားတယ်။ ကမ္ဘာ့ထိပ်သီးနိုင်ငံ့ခေါင်းဆောင်တွေ လာကြမယ်၊ မြန်မာ့ တပ်ဖွဲ့တစ်ဖွဲ့ပါ ပါဝင်မယ့်အကြောင်း ပြောထားတယ်ဆိုတော့ တရားဝင်မှု Legitimacy မှာ NUG ဟာ နစက ကို ရာနှုန်းပြည့် ရှုံးနိမ့်သွားခဲ့ပြီဆိုတဲ့အကြောင်း ပြောချင်တယ်။
ဒါက ဘယ်အပေါ်ကို အကျိုးသက်ရောက်မှုရှိမလဲဆိုရင် ဒီနှစ်အကုန်မှာ ပြုလုပ်မယ့် ရွေးကောက်ပွဲအတွက် အကျိုးသက်ရောက်မှု အများကြီးရှိလာလိမ့်မယ်။ ပျက်အောင်ဖျက်ကြမယ့် မျိုးမစစ်တွေအတွက် ဘာအကြောင်းပြချက်မှ ပေးလို့မရတော့ပဲ ရွေးကောက်ပွဲဖျက်သူတွေအဖြစ်ပဲ ကမ္ဘာက မြင်ကြတော့မှာမို့ အရင်လို နောက်ကအားပေးထောက်ခံသူတွေ အုံနဲ့ကျင်းနဲ့ပါလာတော့မှာ မဟုတ်ဘူးလို့ သုံးသပ်ရပါတယ်။
(#ပိုင်စိုး)
