Gender tanglik
Xotin akam, gender, deydi,
Huquqimiz tengdir, deydi.
Koʻngilni sal kengroq tuting,
Kengga dunyo kengdir deydi.
Men gʻijinib, gender, deyman,
Oʻylab topgan sendir, deyman.
Mana, senga qora oʻchoq,
Mana, senga tandir, deyman.
Xotin kulib, gender, deydi,
Kimdadir bet – chandir, deydi.
Aravani teng tortamiz,
Siz yoqa, men yengdir, deydi.
Men boʻgʻilib, gender, deyman,
Uyda erkak mendir, deyman.
Supurgini xoʻllab supir,
Toshkoʻmirni sindir, deyman.
Xotin yana gender, deydi,
Xotin – boʻy, er endir deydi.
Qizingiz bor, oʻylang birrov,
Yomon erkak “sen” der, deydi.
Men boʻshashib, gendir, deyman,
Qizim – jonim, chindir, deyman.
Jon joyimdan ushlading-ku,
Ha, enangni emgir, deyman.
Iqbol Mirzo
