Yashnobod tuman hokimligi axboroti
Sodiq Azimov ko‘chasidagi daraxt holati yuzasidan ilmiy xulosa asosida choralar belgilandi
2025-yil 11-aprel kuni Ekologiya va iqlim o‘zgarishi vazirligining Toshkent shahar boshqarmasi topshirig‘iga asosan, Yashnobod tumani Sodiq Azimov ko‘chasida joylashgan daraxt holati Toshkent Botanika bog‘i mutaxassisi tomonidan o‘rganildi.
Ilmiy xulosaga ko‘ra, daraxt "Oddiy eman" (Quercus robur L.) turiga mansub bo‘lib, biologik jihatdan yashovchan bo‘lsa-da, tanasining egilganligi, yuqori shoxlarining qurib borayotgani hamda zararkunandalar bilan zararlangani aniqlangan.
Shuningdek, hududda faoliyat yuritayotgan tadbirkor tomonidan daraxtning og‘ishi savdo shoxobchasi tomiga zarar yetkazayotgani yuzasidan murojaat kelib tushgan.
Mutaxassislar tomonidan daraxt holatiga ta’sir qiluvchi salbiy omillar natijasida u xavotirli deb baholandi. Bevosita xavf tug‘dirmasa-da, uning joylashuvi va umumiy holati yaqin atrofdagi yashil maydonlar, savdo obyektlari hamda piyodalar xavfsizligi nuqtayi nazaridan muayyan xavf tug‘diradi.
Shu sababli, Yashnobod tuman obodonlashtirish boshqarmasi tomonidan mutasaddi tashkilotlar bilan hamkorlikda daraxtni olib tashlash (kesish) bo‘yicha zarur choralar belgilandi. Bu qaror daraxtning kelgusida shamol yoki yog‘ingarchilik oqibatida ag‘darilishi natijasida yuzaga kelishi mumkin bo‘lgan salbiy oqibatlarning oldini olish maqsadida qabul qilindi.
