Марказий банк бир ойда 6 та тижорат банкини жаримага тортди
Апрель ойида Марказий банкнинг Банк назорати қўмитаси томонидан ўтказилган йиғилишларда 45 та масала кўриб чиқилиб, тегишли қарорлар қабул қилинди. Бу ҳақда матбуот хизмати хабар берди.
Маълум бўлишича, рўйхатга олиш ва рухсат бериш йўналишида 26 та масала кўриб чиқилган.
Булар қаторида кредит ташкилотлари уставига киритилган ўзгартиришлар (4 та), янги очилаётган микромолия ташкилотларини ҳисоб рўйхатидан ўтказиш (5 та), кредит ташкилотларининг устав фондидаги улушига эгалик қилиш учун рухсат (1 та) ҳамда банкларда аудит ўтказиш ҳуқуқини бериш учун аудиторлик малака сертификатини тақдим этиш (1 та) масалалари бор.
Шу билан бирга, кредит ташкилотларининг молиявий ҳолатига оид 19 та масала — Марказий банкнинг кўрсатмалари ва пруденциал меъёрлари талабларининг бажарилиши, банклар ва микромолия ташкилотларида ўтказилган инспекция натижалари ҳам муҳокама қилинди.
Ўтказилган ўрганиш ва инспекция текширувлари натижасида қоидабузарликлар аниқланиб, 6 та банк, 3 та ломбард ва 2 та микромолия ташкилотига нисбатан жарима санкцияси қўлланилди. Улар жисмоний шахсларга банк ҳисобварақлари очиш ва уларни рўйхатдан ўтказиш бўйича белгиланган талабларни бажармаган.
Бундан ташқари, устав капиталининг энг кам миқдорини шакллантириш ҳамда ташкилий-ҳуқуқий шаклини акциядорлик жамиятига ўзгартириш талабларини бажармагани учун 1 та тўлов тизими оператори ва 3 та тўлов ташкилоти чора ҳамда санкциялар қўлланилиши тўғрисида огоҳлантирилди.
@nasafnewsuz расмий саҳифаси
