O‘zbekiston 9 nafar futbolchi bilan Saudiya Arabistonini mag‘lub etib, Osiyo kubogida zafar quchdi. Qiziq jihati shundaki, Jamoa tarkibidagi hujumchi Nurbek Sarsenbayev va himoyachi Miraziz Abdukarimov birinchi bo‘lim oxirida maydondan chetlatilganiga qaramay, ikkala gol ham aynan shundan so‘ng kiritildi.

Turnir davomida a’lo darajada o‘ynagan Islombek Ismoilov boshchiligidagi jamoa Toif shahridagi “Qirol Fahd” stadionida hujumkor o‘yin ko‘rsatishda davom etdi.

Ikkinchi bo‘lim boshida himoyachi Muhammad Hakimov penalti orqali hisobni ochdi, 70-daqiqada esa qanot hujumchisi Sadriddin Hasanov chiroyli harakatlari evaziga g‘alabani mustahkamladi. Hasanov bu turnirda ko‘rsatgan yuqori saviyali o‘yini uchun musobaqaning eng yaxshi futbolchisi, deb e’tirof etildi.

O‘zbekiston so‘nggi sakkizta qit’a turnirining yettitasida kamida chorak finalgacha yetib borgan va 2023-yilda Indoneziyada o‘tgan so‘nggi jahon chempionatida ham shu bosqichgacha yetib kelib, yaxshi taassurot qoldirgandi, — deyiladi FIFA xabarida.

Avvalo, O‘zbekiston xalqiga g‘alaba muborak bo‘lsin. Bu g‘alaba zamirida juda ko‘pchilikning mehnati yotibdi. So‘nggi yillarda yurtboshimiz sportga, ayniqsa futbolga alohida e'tibor qaratmoqda. Buning uchun tashakkur aytamiz. Shuningdek, O‘FA rahbariyati, Xalqaro aloqalar va Terma jamoalar bo‘limi hamda bizning jamoamiz uchun mehnati singgan har bir insonga minnatdorlik bildiramiz. O‘zbekiston futbol assotsiatsiyasi tomonidan shu kunga qadar biz uchun juda ko‘plab yig‘inlar tashkil etildi, xalqaro turnirlarda ishtirok etishimiz uchun sharoit yaratib berildi.

Vatanimiz doimo qahramonlar, mard insonlar yurti bo‘lgan. Buni futbolchilarimiz yana bir bor maydonda ko‘rsatib berishdi. Fantastik o‘yin bo‘ldi, bu jasorat, matonat namunasi. Yigitlarga rahmat aytaman, ular imkonsiz vazifani bajarishdi. Hissiyotlarimizni so‘z bilan ta'riflab bo‘lmaydi. Oldimizda yanada muhim turnir bizni kutmoqda. Jahon chemionatida ham yurtimiz sharafini munosib himoya qilamiz.