✅ الناشط الفلسطيني الشهير أبو سمير العامودي ✍🏻 يكتب على صفحته (يوميات أبو سمير): رسائل كثيرة وصلتني: "شو رأيك بما حدث في مسيرة بيت لاهيا؟"
▪المسيرة عفوية، ومن شارك فيها هم من أبناء غزة، اللي صمدوا وضحّوا وقدموا الشهداء والجرحى. ومن واجبنا نسمع صوتهم، وممنوع حد يخوّنهم، ورأيهم يُحترم.
▪العتب إنّه أي فلسطيني يقول لأخوه الفلسطيني: "برا برا!" فلسطين للجميع.
▪زي ما في ناس ما بدها حماس تحكم غزة، في ناس بدها إياهم. هاي آراء تُحترم، وإحنا شعب بيقول رأيه وما بيخاف من حد.
▪ضد استغلال المسيرة في المناكفات السياسية.. الكل مع مقاومة هالمحتل.
▪العدو بده يهجّرنا كلنا، وبيقصفنا بدون تلوين أو تفريق.
▪لو حماس بدها كرسي، ما كانت قامت بهيك عملية، كانت قاعدة بتحكم ومبسوطة.. اللي ضحّى بدمه وقاتل لآخر نفس، ما بيدوّر على كرسي.
▪أذناب الاحتلال، واللي بيفكروا يركبوا الموجة، انسوا. بلادنا محمية بدماء أبنائها.
▪هلا وقت الحرب: أنا وأخويا وابن عمي على الغريب.
▪نداء للمفاوض: شعبنا تحمّل ما لا تطيقه الجبال. أي تنازل ممكن يوقف الإبادة، نحن نطالب، لكن لا يشمل الوطن، ولا القضية، ولا الأسرى، ولا المسرى، ولا سلاح الوطن وعزته. فالتنازل هنا جريمة.
▪مخاتير بيت لاهيا قالوا: نحن مع المقاومة، وجزء قال بدنا حماس تحكم غزة. والطرفين وجهة نظرهم تُحترم.
▪شوفوا العدو، في مع "النتن" (نتنياهو) وفي ضدّه، وبالآخر هم ضدنا كشعب.
▪الضفة تُستباح، وما في حماس هناك، بس ننتبه.
▪أخيرًا، هاي ظاهرة صحية في مجتمع حر، والكل صح، بس ننتبه: إحنا في مركب واحد، يا بنغرق سوا، يا بنعدّي سوا.
▪انتبه تكون أداة للعدو. انتقد، طالب، احكي رأيك، بس بدون تجريح ولا تخوين ولا طعن في ظهر المقاومة.
▪أهل الشمال اللي صبروا وأفشلوا التهجير، هم اللي حيحموا المقاومة.
▪تحية لكل الأصوات، وآسف إذا طولت عليكم.
#ملاحظة: أنا مع المقاومة، ومع الشعب.. ممكن رأيي يطلع خطأ، مش قرآن كلامي، يعني ما حدا يخوّني.
