UzTest | Rasmiy kanal

Ijtimoiy tarmoqlarda Piskent tumanida joylashgan laboratoriyaga navbat olish jarayonlarida muammolar kuzatilayotgani hamda avtomashina egalarining 10 million so‘mgacha xarajat qilayotgani haqida xabarlar tarqaldi. “O‘zbekiston ilmiy-sinov va sifat nazorati markazi” davlat muassasasi ushbu xabarlar yuzasidan quyidagilarni ma’lum qiladi.

Toshkent viloyati Piskent tumanida joylashgan elektromagnit moslashuvchanlik laboratoriyasi bugungi kunda 100-120 ta avtomobil sinovlarini o‘tkazish imkoniyatiga ega. Laboratoriya 24/7 shaklda faoliyat olib bormoqda, shu jumladan, bayram kunlarida ham ishlashda davom etadi.

Hozirgi vaqtda korrupsiyaviy holatlarni oldini olish maqsadida M1 toifadagi transport vositalarining muvofiqligini baholashga navbat olish O‘zbekiston Respublikasi Yagona interaktiv davlat xizmatlari portali orqali amalga oshirilmoqda. Elektron navbat mijozga qulay vaqt uchun QR-kod qo‘yilgan tartibda shakllanadi va buning uchun Yagona identifikatsiya tizimi (one id) yoki elektron raqamli imzo kalitlaridan foydalaniladi.

Joriy yilning 20-25-mart kunlari elektron navbat olish tizimiga ayrim IP manzillardan toʻxtovsiz juda koʻp soʻrovlar joʻnatish, sun’iy ravishda tizimda yuklamani oshirish va elektron navbatlarni egallash harakatlari kuzatildi.

“Raqamli hukumat loyihalarini boshqarish markazi” DM hamda Yagona integrator “UZINFOCOM” MChJ mutaxassislari bilan birgalikda navbatga olish elektron tizimi yanada takomillashtirilmoqda, himoya vositalarini joriy qilish ishlari olib borilyapti. Hozirda tizimning faoliyati test rejimida ishlamoqda.

Markazda 1 dona ektromobilni sertifikatlashtirish uchun xizmat ko‘rsatish narxi 4 479 888,00 so‘mni tashkil etadi. Shuningdek, gibrid, benzin hamda dizel yoqilg‘idagi yengil turdagi avtotransport vositasi uchun to‘lov qiymati 5 599 888,00 so‘m ekanligini inobatga olgan holda ommaviy axborot vositalarida ta’kidlangan narxlar to‘g‘risidagi ma’lumotlar asossiz ekanligini ma’lum qilamiz.

Mazkur belgilangan narxlarga qo‘shimcha tarzda pul talab qilish holatlari kuzatilgan taqdirda O‘zbekiston texnik jihatdan tartibga solish agentligining 1880 qisqa raqamiga to‘g‘ridan-to‘g‘ri murojaat qilishingizni soʻrab qolamiz!

2025-yil 13-aprel kuni “Leapmotor Automobile Co. Ltd.” kompaniyasi tomonidan Texnik jihatdan tartibga solish bo‘yicha O‘zbekiston texnik jihatdan tartibga solish agentligi va “O‘zbekiston ilmiy-sinov va sifat nazorati markazi” davlat muassasasi nomiga rasmiy murojaat xati yuborildi. Ushbu murojaatda kompaniya O‘zbekiston hududiga ruxsatsiz distribyutorlar orqali olib kirilgan C16 rusumli avtomobil holatini tan olib, bunga oid muammolarni bartaraf etish bo‘yicha bir qator choralarni ko‘rishga tayyor ekanligini bildirdi.

Xatga ko‘ra, “Leapmotor” kompaniyasi quyidagilarni tasdiqlamoqda:

✅ O‘zbekiston Respublikasida faoliyatini faqat rasmiy distribyutor orqali davom ettiradi.
✅ Norasmiy (ruxsatsiz) olib kirilgan avtomobillar kompaniya tomonidan tan olinmaydi va ular uchun rasmiy kafolat va xizmatlar taqdim etilmaydi.
✅ Turni tasdiqlash hujjatini (OTTC) olish bo‘yicha sinov jarayonlari tez fursatda yakunlanadi.
✅ Kelgusida “UzTest” bilan sifat nazoratini kuchaytirishga qaratilgan keng qamrovli hamkorlik yo‘lga qo‘yiladi.

Mazkur hamkorlik avtomobillar xavfsizligi, sifat va texnik talablarga muvofiqligini ta’minlashga xizmat qiladi. “UzTest” kompaniyaning ushbu tashabbusini yuqori baholaydi va foydalanuvchilarning xavfsizligini himoya qilishga xizmat qiluvchi barcha jarayonlarda faol ishtirok etishda davom etadi.

Ma’lumki, joriy yilning mart oyida Xitoyning “Leapmotor” tovar belgili “C16” avtotransport vositasida aniqlangan nomuvofiqliklar sababli, ularni sertifikatlashga arizalar qabul qilish yuzaga kelgan vaziyat bartaraf qilingunga qadar vaqtincha to‘xtatilgan edi.

Mazkur masala yuzasidan Xitoyning “Zhejiang Leapmotor Technology Co. LTD” kompaniyasiga “O‘zbekiston ilmiy-sinov va sifat nazorati markazi” davlat muassasasi tomonidan murojaat bilan chiqilgan va uning natijasida joriy yilning 7-aprelida Gu Jiven boshchiligidagi Kompaniya vakillaridan iborat delegatsiya a’zolari “O‘zTest”ga tashrif buyurgan hamda vujudga kelgan vaziyat kompaniya mas’ullari bilan muhokama qilingandi.

Natijada, kompaniya tomonidan “Leapmotor” tovar belgili “C16” rusumli 2 ta avtotransport vositasi O‘zbekiston Respublikasiga import qilindi hamda joriy yilning 14-aprel kuni Markazning Pskent tumanida joylashgan “Elektromagnit moslashuvchanlik sinov laboratoriyasi”da kompaniya mutaxassislari hamda ommaviy axborot vositalari ishtirokida Birlashgan Millatlar Tashkilotining 10-son qoidalarida belgilangan tartibda qayta sinovlardan o‘tkazildi.

❗️O‘tkazilgan takroriy sinovlar yakunida Kompaniya tomonidan import qilingan “Leapmotor” tovar belgili “C16” rusumli avtotransport vositasi BMTning 10-son qoidasi talablariga muvofiq topildi hamda “Leapmotor” kompaniyasiga shartli ravishda mazkur tovar belgili avtotransport vositalarini respublikada muomalaga chiqarilishiga ruxsat berildi.

Mazkur shartlar:

1. “Leapmotor” tovar belgili avtotransport vositasining nomuvofiqligi aniqlanganda ularni bartaraf qiluvchi hamda iste’molchiga yetkazilgan zararni qoplovchi ishlab chiqaruvchining rasmiy vakili - O‘zbekiston Respublikasida rezident hisoblangan yuridik shaxsni belgilash.

2. Respublikaga import qilinayotgan “Leapmotor” tovar belgili barcha avtotransport vositalarining turini ma’qullash uchun zarur bo‘lgan tegishli hujjatlarni taqdim qilish (Ma’lumot uchun: turini ma’qullash hujjati – avtotransport vositalarining muvofiqligini baholashning ijobiy natijalari asosida belgilangan tartibda rasmiylashtirilgan, bir turga kiruvchi transport vositalarining texnik Reglament talablariga muvofiqligini tasdiqlovchi hujjat).

3. “Leapmotor” tovar belgili avtotransport vositalari ishlab chiqarilayotgan korxonalarda ishlab chiqarish jarayonlari va shartlarini o‘rganish va baholash majburiyatlarini ham o‘z zimmasiga oldi.

Ijtimoiy tarmoqlarda Piskent elektromagnit moslashuvchanlik laboratoriyasida avtomobillarning tekshiruvi bilan bog‘liq asossiz xabarlar tarqalmoqda. “O‘zbekiston ilmiy-sinov va sifat nazorati markazi” davlat muassasasi tarqalgan lavha bo‘yicha quyidagilarni ma‘lum qiladi.

“Oʻzbekiston ilmiy-sinov va sifat nazorati markazi” davlat muassasasi Qashqadaryo filiali sertifikatlashtirish organi va sinov laboratoriyasi mutaxassislari Qamashi tumanida joylashgan, Ozarbayjon investori hisoblangan “Matanat” xususiy korxonasida texnik jihatdan tartibga solish sohasidagi mavjud muammo va takliflarni o‘rganishdi.

Korxonada xorijiy davlatlardan import qilinayotgan mahsulotlarni sertifikatlashtirish bo‘yicha vakillar bilan birgalikda O‘zbekiston Respublikasi Vazirlar Mahkamasining 43-sonli, 683-sonli va 502-sonli qarorlariga asosan “Majburiy tartibda sertifikatlanishi lozim” bo‘lgan mahsulotlar ro‘yxati yuzasidan tushuntirishlar berildi.

Navoiy viloyati, Navoiy shahrida joylashgan bog‘lovchi gips mahsulotlari hamda bog‘lovchi gipsdan tayyorlangan quruq qurilish arlashma mahsulotlari ishlab chiqarish va eksport qilish bilan shug‘ullanuvchi “Blend mix” MCHJda “Oʻzbekiston ilmiy-sinov va sifat nazorati markazi" davlat muassasasi Navoiy filiali mutaxassislari tomonidan muvofiqlikni davriy baholash ishlari olib borildi.

Hozirgi kunda mazkur korxona bog’lovchi gips mahsulotlarini Tojikiston, Qozog‘iston, Qirg‘iziston va Tojikiston davlatlariga eksport qilib kelmoqda.

Korxonaning texnologik jarayonlari va sifat nazorati tizimi mutaxassislar tomonidan ijobiy baholanib, kelgusida mahsulotlarining texnik va sifat ko‘rsatkichlarini yanada oshirish borasida tavsiyalar berildi.