ЦВІТНА НИДЇЛЯ
Цвітна, авадь Вербна, Шуткова нидїля – єдно из май великых рӯчных християнськых сят, котроє руснакы фурт дуже чикавут. Цвітна нидїля выдкрыват Страсный тыждинь, на другу нидїлю уже Великдинь. Сього дне мы споминаєме, як Ісус Христос зайшōв на ослови у Єрусалим, і чилядь стелила перед ним на путь пальмовоє листя. А мы у церкви будеме сятити шуткы, вербу.
Чōму сятит ся верба ясно, бо май скоро ся рōзпущат. Дїточкы у субōту глядавут, де бы си шуток нарубати. Хōтят учинити си файный букет, ōбы пак рано понисти сятити. Виды вербы у нас рōстут усякі, тōму у каждого дїтвака, на рӯсках, шуткы инакі, што дуже файно вызират.
Тямлю, кōй им быв малый, та як у субōту паровав им си на нидїлю, рано шуткы. Дуже'м ся радовав, кидь збере ся у букет много красных, пышных рӯсок. Мало паскудно тоды, кōй Великдинь припадат на май, кидь тепло, та верба выдцвітат, а шуткы уже зачинавут выдпадати. Треба ми было тоды дуже читаво сокотити, ōбы ни приности пак дōмӯв самі рӯскы.
Израна'м уставав та на 7. годин, ги усї дїти, ишōв до церкви. Май ся запоминат, кӯлько тōй зеленины тай як ароматно у храмі! Кōй зачинат священик сятити, та усї дїти пӯднимавут шуткы гурі, ōбы ся посятили. Пōсятят ся точно, тай вшидкі сме были фест мōкрі, а ищи итак просимее, ōбы нас ищи священик посятив. Дале за тым мированя и ишли сме дōмӯв.
На Цвітну нидїлю, доста много ся чиляде привыкло спōвідати, ōбы пак цїлый рӯк цвісти. А посячинї шуткы, за народными вірованями, читаво ся чилядьов хōснувут, ги оберегы тай пōмӯч у разных обрядовых актах. Приміром, уже скоро будут ґаздынї печи паскы, та на лавор из замішеным кістом покладут шуткы. Сяк ōно ся сятит тай всокочено выд нечисти. А тогорӯчными сячеными шутками, кидь сут , розпальовали огинь, ōбы печи паску.
Клали рӯскы вербы у хыжи тай стайни, ōбы всокотити опшаря, чилядь тай худōбу выд всякōй нечисти. Примір, рӯскы ся клали ид малӯй дїтинї, ōбы всокотити выд злых сил Руснакы вірили, ож сячена шутка всокотит и выд тучі тай пожарӯв. Лиґінї тай люде прикопчовали си дарабчик шуткы ид клибани, ōбы іх ни врекли. Сякых ищи віровань є дуже много.
Но тай ни мож забыти, ож на исе сято, символічно пак бют посяченōв вербōв, ōбы были вшидкі здōрōві и богаті.
2021.
#Мигаль_Чикивдя
