Aleksandr Xomyakov: “Raqibga omad kulib boqdi”
Superliganing 6-turidagi “Andijon” – “Dinamo” (1:2) uchrashuvidan soʻng tashkil etilgan matbuot anjumanining ikkinchi qismida jamoamiz bosh murabbiyi Aleksandr Xomyakov jurnalistlarning savollariga javob qaytardi.
- Turnir jadvalining yuqori oʻrinlarida borayotgan ikki jamoa oʻrtasidagi oʻyin guvohi boʻldik. Yaxshi oʻynash va gʻalaba qozonish asosiy vazifamiz edi. Extiyot boʻlib harakat qildik, baʼzi vaziyatlarda aniqlik yetishmadi. Bugungi oʻyinimiz va natijamiz bilan muxlislarimizni xursand qilolmadik. Bir qancha imkoniyatlardan foydalana olmadik. Masalan, bir vaziyatda Turdimurodov gol ura olmadi. Ikkinchi taymda ham toʻp oʻtkazib yuborgunimizcha bir qancha vaziyatlarimiz boʻldi. “Dinamo”ni hisobni ochganidan keyin ancha faolroq oʻynadik. Lekin natija yaxshi boʻlmadi. Alamli magʻlubiyatga uchradik. Afsuski, oʻz maydonimizdagi ketma-ket ikkita uchrashuvda yutqazib qoʻydik. Omad ham kelmadi, deb oʻylayman. Raqib ancha aqlli oʻyin koʻrsatdi. Qaysidir vaziyatda nimadir oʻxshagandek boʻldi. Biroq VAR bilan bogʻliq holat, vaqt choʻzilishi ham bizning zararimizga ishlagandek. Afsuski, soʻnggi daqiqalarda toʻp oʻtkazib yuborganimiz alamli kechdi. Oxirgi daqiqalarda extiyotkor oʻyin koʻrsatishimiz kerak edi. Yigitlar ham qoʻldan kelganicha harakat qilishdi. Ogʻir oʻyin boʻldi.
- Gʻalaba kutgandik, magʻlubiyatga kim asosiy sababchi deb oʻylaysiz?
- Biror narsa deyishim qiyin. Kim asosiy sababchi boʻlishi mumkin? Umumiy maʼnoda aytganda, raqibga omad ham kulib boqdi. Ular omad tufayli gʻalaba qozonib ketdi. Oxirigacha harakat qilishdi va kerakli natijaga erishishdi. Maydon markazida faol oʻynashdi. Biz aynan shu hududda koʻp imkoniyatlarni berib qoʻydik.
- Avvalgi uchrashuvlarda oʻyindan qoniqmadim, deb aytgandingiz. Bugungisidachi?
- Koʻp vaziyatlarda shunday deb aytaman. Yana nima deyishim mumkin? Tigʻiz taqvim, oʻyinlar tez-tez oʻtkazilyapti. Bu holat ham taʼsirini oʻtkazgan. “Dinamo”da esa bizdan farqli oʻlaroq bizga nisbatan tiklanish uchun vaqt koʻproq boʻldi. Natija ham, oʻyin ham meni qoniqtirmadi. Fikrimcha, bizda hech narsa oʻxshamadi. Ayniqsa, qanotlardagi harakatlarimiz yaxshi chiqmadi. Koʻp xatolarimiz boʻldi. Natija biz uchun qoniqarsiz yakun topdi.
- Koʻpchilik “Andijon”ning asosiy quroli standartlar deb ataydi. Haqiqatan ham shundaymi yoki bu sizning oʻziga xos uslubingizmi?
- Menimcha, hamma jamoaning standartlari asosiy quroli hisoblanadi. Oʻyindagi vaziyatlarga qarab standartlardan unumli foydalanishga harakat qilamiz. “Dinamo” ham standart vaziyatlardan foydalanish harakatida boʻladi. Bunday usullardan foydalanish boʻyicha faqat biz emas, boshqalar ham bu kabi standartlardan yaxshi foydalanish boʻyicha ish olib boradi.
- Murabbiylar tomonidan hali ham optimal tarkib tuzilmayapti. Nega doim rotatsiyalarga qoʻl urilyapti?
- Futbolchilar robot emas-ku, ular ham charchashadi. Doim barqaror oʻyin koʻrsata olishmaydi. Oʻyinlar orasidagi vaqtning qisqaligi, baʼzida har 3-4 kunda oʻynashga toʻgʻri kelyapti. Vaziyatdan kelib chiqib, kimgadir dam beryapmiz. Kimgadir imkoniyat beryapmiz. 20 dan ziyod oʻyinchilarimiz bor. Biri boʻlmasa, boshqasini oʻynatamiz. Vaziyatdan chiqib ketishga harakat qilamiz.
👍 @andijonpfc
✈️✈️✈️✈️✈️🚗🚗🎟🎟🎟
