تنيتك تلجم بروحي الجرح
وانه اعله جفك دم
تموت وياك كل گطره بحزن عمرين
وتردلك نعش يحلم
غريبه الدنيه بعيونه
وعلى اجناحك لگه أخياله
ومشه جناز بجروحه اعله درب الدم
اوحده ويه الصوتوا ليله يباجي الدم
نشف باجي العمر امطر يباجي الدم
تنيتك سيف گطعني
ولك مرخوص لا ترحم
حلاتك لو صرت حنظل واجرعك سم
وأعاند بيك ملگه الموت عين بعين
يطش روحي الهضم وألتم
ولاهي تهون
كل سچه وعثر بيه مهر أدهم
حلاتك لو صرت حنظل وأجرعك سم
وأصليلك
يمعبودي يجرحي العشگتك روحي
أصليلك
صلاة المالگه ذنوبه اعله ياهو يموت
صلاة التيه دروبه اعله ياهو يفوت
صلاة الما دره جروحه بحلگ ياحوت
وأبجيلك اتغير دموعي ألك مهرة شمس
خياله موزم
يخي عونه ويهنياله
الدره الياعله مفتاح الدمع يرهم
يا سر الدمع والدم
أموت أبيض عله امتونك
وردلك سيل يدفع سيل
ويسبگني ضميري ابصوت:-
يغافي اعله الثلج والنوح
اجيتك هذا انه بنادم
يرف گلبي اعله بنادم
واحنن حنة ابنادم
واموتن موتة ابنادم
انه شما جلب بروحي
أشوفني انه ابنادم
انه المامش خيال يوالم أخياله
انه الضحكت جروحه
بوجه جتاله
يا سر الدمع والدم
غريب انه غريب انه
وانشدك هلبت اتگلي
ياهو السوه جيفارا نبي المگوار والفاله
غريب انه
وغريب الماي البچفي
اشوفن بي عطش روحي
غريب انه
غريب المعنه البحرفي خلط بين الضحك نوحي
غريب انه
وغريب ابلا نهر جرفي يبس ماروته أجروحي
وشحيح الدم يباجي الدم
نشف باجي العمر امطر يباجي الدم
وأصليلك يمعبودي يجرحي العشگتك روحي
أصليلك تردلي اثنين
أشوفنك ضوه بيا عين؟
عين الدمع؟
عين الدم؟
عين الما بجت مرتين؟
اشوفنك ضوه بيا عين؟
وأصليلك
تمر بيه ضوه بيا حد؟
حد الجزر؟
حد المد؟
حد الما وصل للحد؟
يامجرى الشمس گلي ضواك اشگد؟
اخذ من روحي گطرة ضيم
تطفي شما ضواك امتد
يلن هذا العمر وياك غيمه بريح
وجروف السمه بلا حد
تمر بالروح
جزر واتروح
أموتن وانته تطفح مد.
-ذياب كزار
