Karyerangizda tez va barqaror o’smoqchimisiz? Bugun sizga bir sirini ochaman: tayinlilik.
O’ylab ko’rsam karyerada ishonch eng muhim omillardan biri ekan. Katta gapirib ishonch texnik bilimlardan ham muhim desam balki noto’g’ri bo’lar. Lekin, sizga bo’lgan ishonch sizning texnik bilimingizchalik muhim deb katta ishonch bilan ayta olaman.
Bir do’stim bor, uni dasturlash dahosi deyishadi. Lekin unga 100% ishonib bo’lmaydi, uncha “predictable” odam emas. Boshqa bir do’stim bor, 10x injiner deb bo’lmasada yaxshi dasturchi. Ammo, shu do’stim aytganini (besabab) qilmaganini hech eslolmayman. Kir yuvish moshinalari kabi insonlarga ham “100% ishonch” belgisi qo’yilganda, shu bolani peshonasiga belgini shubhasiz yopishtirsa bo’lardi. Biror ish qilish kerak bo’lsa men har safar shu do’stimni tanlayman.
Siz qanday qilib shu do’stimdek bo’la olasiz?
— Kelishilgan vaqtga o’z vaqtida kelish. Rejalar o’zgarib qolsa vaqtida habar berish.
— “Commitment” qila olish. Biz o’zbeklar negadur bir narsaga oldindan “sodiqlik” qila olmaymiz: “Ko’ramiz” va “Xudo xolasa” degan gaplarimiz ko’p.
— Kelishilgan ishni muddatgacha (deadline) tugatishga 100% harakat qilish. Muddatga ulgurilmayotgan bo’lsa iloji boricha vaqtida habar berish.
— Bir soxada yetarlicha ishlash. Sizni hamma X ishni zo'r qiladi chunki anchadan beri qiladi deb o'ylashsin. Sakrayvermang quyonga o’xshab.
— Bir kompaniya bilan yetarlicha qolish. Ko’proq pul to’laymiz deyishsa har 4-6 oy ishdan ishga sakrayvermang. Ba’zida tamoyillar (printsiplar) puldan ustunroq kelishi kerak.
Tayinli bo’ling, O’zbekiston ish bozorida bunday xislatga ega odamlar kam. Shu xislatni o'zi bilan qolganlardan ajralib turish juda oddiy ish. Gapimni aniqlashtiraman: oddiy, oson emas.
