ڕابوون

مەرۆ مەرۆ بابە مەرۆ
بۆ جێمان دێڵی
تاکەی ژیان بەرینەسەر
هەروا بە وێڵی
تا کەی خەمی ئەم میللەتە
بگرینە باوەش
تا کەی لە سۆزی باوکێتی
دەمانکەی بێ بەش

ئەرۆم ئەرۆم زویر مەبن
وردیلەکانم
تا سەربەستی بەدەست دێنم
بۆ کوردستانم
تاکو نەخشەی ئەم وڵاتە
نەگۆڕینەوە
دڵنیابن رۆڵەکانم
ناگەرێینەوە

ئەڕۆم ئەڕۆم
زویر مەبن وردیلەکانم
لەم کاروانە بەجێ ماوم
لە هاوڕێکانم
ئێوەش پاک بن بۆ نەتەوە و
خاک و وڵاتتان
لە دوا ڕۆژا بەسەربەرزی
دێمەوە ناوتان

مەرۆ مەرۆ بابە مەرۆ
ئیمەش رێدەگرین
مەتارەی ئاو چارۆکەی نانتان
بۆ هەڵدەگرین
ژیانی شار مانەوە
ئەم ماڵەو ئەو ماڵە
راکردنە ئەشکەنجەیە
ژەهرێکی تاڵە

نابێ قەت ناڵەی
جودایی بێەسەر
جا چ نەی بیکا
چ پیاوی دەربەدەر
بۆیە ناڵەم تێکەڵی
نەی کردووە
شیوەنێکم پێیە
نەی نەیکردووە
شیوەنی من
شیوەنی ئینسانییە
بانگی ئازادی و
گڕۆی یەکسانییە
شیوەنی من
شینی کوردی بێبەشە
ئەو گەلەی
حاشا دەکەن لێی و هەشە
پارچە گۆشتێکە دڵی من
ڕوو نییە
ناڵەناڵی من درەنگە
زوو نییە

ئەڕۆین ئەڕۆین گشت پێکەوە
بۆ ئەم شۆڕشە
بۆ خەباتی سەخت و دژوار
تێشو و کۆششە
یا هەموومان لەم ڕێگایا
خوێنمان دەڕژێنین
یاخود چرای ئازادیی کورد
دائەگیرسێنین