#aks
Gеrmaniyaning «Bild» nashri Surxandaryodagi to'y sahnasi haqida yozyapti:
«Hеch kim o'rnidan turib kuyovni kaltaklamaydi. Hеch kim politsiyaga xabar bеrmaydi. Chunki O'zbеkistonda ayollarga nisbatan zo'ravonlik har kuni non sotib olishdеk oddiy hol”.
So'nggi kunlarda ijtimoiy tarmoqlarda ikki video trendda: to'yi kuni kaltaklangan kelin va shifoxonada kasal bolasini urayotgan asabiy ayol.
Kimga qanday, bilmadim, ammo menga bu ikki holat ko'pfaslli filmning beshinchi va o'ninchi qismlaridek tuyildi. Voqealar rivoji esa taxminan quyidagicha:
Qizlarning do'pposlanishi oddiy holat, deya o'stirilgan, "bir joyga kelin bo'lib borsang, ering... qaynonang....!" tahdidlarida ulg'aygan, o'ziga ishonchi pastgina kelin(serialning 1-5-qismlari), hammaning ko'z o'ngida kaltaklangani to'ydan keyin qo'rqa-pisa, indamaygina "kuyovto'ra"ning uyiga ketadi. (To'g'ri-da, hech yo'q to'y kuni, yolg'ondakamiga bo'lsa ham kuyovga "hay" deb qo'ymagan, uning yonini olmagan valiylari qizni to'ydan keyin uyiga olib ketarmidi? Axir, "Chiqqan qiz chig'iriqdan tashqari!!!" "Kelinlik bilan kirgan uyingdan kafaningda chiqasan!!!" Firmenniy maqollarimizning eshitilishiyoq dahshatning o'zginasi.)
Kunlar o'taveradi, kuyovto'ra ishdagi, ko'chadagi omadsizliklarining alamini ayolidan olaveradi: uyda tuz to'kilsa ham, noxosdan soda sochilib ketsa ham, gugurt cho'pi sinsa ham,mushukning burni qiyshiq bo'lsa ham, xullas, bir bahona topilsa, uraveradi. Xudo berib kelin bir kun ona bo'ladi, homiladorlik davrini stresslar ichida o'tkazmaganmi, bola immuniteti past, nimjon bo'lib tug'iladi. Buyog'i dori, ukol, shifoxona - uy, uy - shifoxona... Kasalmand bola tug'ding, degan ta'nalar, bosimlar, davolatish pulidan qochishlar,tashlab qo'yishlar... Ruhiy jihatdan sog'ligi ham ketib bo'lgan ayol norasidasini "barcha balo-qazolar sababchisi" deb o'ylab qolar darajaga yetgan. Negativlarini bolaga sochgan. Bir "xolis", bolajonni ajratib olish o'rniga voqeani videoga olgan-u kimgadir jo'natvorgan.(6-10-qismlar)
Uyog'i o'zingizga ma'lum...
Voqeadan xabar topgan "adolatli klavishpolvonlar" zolim onani kommentlarda, postlarda rosa "atata" qilishadi,qarg'ashadi, yozg'irishadi. Achinarlisi, ayolni hayvondan olib hayvonga solgan,bir nimalarga hukm qilgan,har narsa deganlar ichida kishilar ko'ziga ilmli figura bo'lib ko'ringanlar ham bor. Afsusdaman.
Ayolning qilig'ini aslo oqlamayman,aslo. Musibat holida, ruhiy stressda qilingan gunoh ham gunoh. Ammo, biz ko'rayotganimiz - natija, xolos. Sabablar haqida kim qiziqib ko'rdi? Ayol nega bu holatga kelgan? Qizlik uyida dadasi oyisini urganmi? Qizini-chi? Bolaning mehribon dadajonisi qani?
Ayol oxirgi marta qachon kaltak yegan? (Balki biroz avval, shu palatada, eridan?!)
Shu bolaga odamlar ichida eng mehriboni Onaning o'zi emasmidi?!...
Sog'lom onaning tabiati - bolasini hatto shamoldan avalyash. Bo'lib ham bemor bolajoniga tekkan paxta ham onaga temirdek botsa kerak. (Bilmadim, men onalikni shunday hassosiyat deb tasavvur qilaman.) Odam tabiatidan chiqib ketar darajaga kelishi uchun aaaancha kunlarni boshidan o'tkazgan, befarq, hissiz bo'lib qolgan bo'lishi kerak.
O'ylab o'yimga yetolmadim...
Ayollarga shiddat qo'llash haqida o'zimiznikilar nima deydi?
Hozircha bir qancha ayollarning fikrlarini o'qidim, ular asosan ikkiga ajralgan:
1. "Ayollarni urmaslik kerak, bu - ojiz erkaklarning ishi", deyotganlar, huquqiy chora talab qilayotgan, ijtimoiy roliklar ishlayotganlar - ular feministlar deb atalyapti. Ularni qo'llab turgan ozchilik ham bor.
2. "Kelinposhsha yutqazibersa bo'lardikan, kuyovimizni xursand qilishi kerak edi😌" deyaptilar bir muxbiraxon, "ayol degani tilidan yeydi", dedilar bir bloger qizimiz, "aslida kaltaklanish foydali"🤓deydi bir PSIXolog opamiz. Ularni olqishlab, alqab turganlar ko'pchilik.
