•هەیڤاپڕ•

مناڵەکان!
ئێمە تووشی سەد کوێڕەڕێین
چرای بیرمان گەلێک کزە
هەنگاوی کوێرانە دەنێین!
مناڵەکان!
ئەفسانەکان دەگێڕنەوە:
هەبوو...نەبوو...
هۆزێک هەبوو لە خاکێکا
پاڵەوانیان چاوی کوێر بوو،
هەوای دەورەی خۆی دەپێکا.
فەیلەسووفیان
فاڵچییەک بوو،
شەوان فاڵی دەگرتەوە،
تا بزانێ کەی دوژمن بۆی
پەت دەخاتە گەردنی خۆی.
پیاوماقووڵیان
کەڕ و ڵاڵ بوو،
ماوەی کورتی ئارامیشی هەزار ساڵ بوو!
هۆزی نەگبەت
شەوی دەژمارد،
ڕۆژی دەژمارد،
سێ ژەم نان و چەپڵەی دەخوارد،
چاوەڕێ بوو کە دوژمن بۆی
پەت بخاتە گەردنی خۆی!
مناڵەکان!
ئەی بێلانە ژینتاڵەکان:
زۆر لەمێژە دایکەکانی ئەم وڵاتە
مەمکەکانیان
شیری سەربەستی تیا قاتە.
زۆر لەمێژە کێوەکانی ئەم وڵاتە،
پێغەمبەرێکیان تیا قاتە.
مناڵەکان!
لە ئاگردانی چاوتاندا،
من چاوەڕێی زەردەشتێکم،
بێ، جێ بەو بتانە لەق کا.
من چاوەڕێی
چەخماخەی ئاڤێستایەکم،
بێ جەرگی تاریکی شەق کا!