ما تجين
شظل بعد من العُمر
يالماتجين
راحت الدنيا بأهلها
واحنا باچر رايحين
لا گعدنا ولا حچينا
ولا إديچ تشابگت مرّة وي أدينا
ولا ربيع المَر علينا
وچم خريف احترگت بسده السنين
ما تجين ؟
مرّت إيام وليالي وما أجيتي
ولا نشدتي شلونّه وچنچ نسيتي
ولا نسى ومر بشواطيچ الحَنين
ما تجين ؟
اليحب لازم يمر مرّة بحَبيبة
والمفارگ هم يهزه الشوگ لأحبابه ويجيبه
وانتِ ما چنچ حَبيبة
ولا كسر گلبج عذاب العاشگين
ما تجين ؟
شظل بعد وإلمن بعد تتأملين ؟
انتحرت النجمة بسمانه
وانذبح زاجل هوانه
وأعلن البلبل حداده
وطائر النورس حزين
ما تجين ؟
سنين مرّن وأحنا ليچ مناطرين
وخايفين تمر عليج حچايه من شماتنا
وتتغيرين نستحي نعاتب نجيچ
وندري بيج من العَتب ما تستحين
ما تجين ؟
عدنا شوگ المشتهيچ
وعدنا خاطر مشتريچ
مزاعلتنا وليش من عدنا العشگ ما تشترين
ما تجين ؟
بيه واهِس سندباد
وذاك چتفه الما تعب من ياسمين
ما تجين ؟
