စိတ်ကူးယဥ်မြန်မာ့ DOGE
==========================
အမေရိကန်မှာ ထရမ့် တက်လာပြီးနောက် အီလွန်မတ် ကို DOGE ဆိုတဲ့ အဖွဲ့ ဖွဲ့စည်းစေပြီး တိုင်းပြည်နဲ့လူမျိုးအတွက် အကျိုးမရှိတဲ့ လုပ်ငန်းတွေကို ရပ်တံ့ပစ်ဖို့ စီစစ်ကြပါတယ် ။
DOGE အီလွန်မတ်ကနေ သြဇာအာဏာ လုပ်ပိုင်ခွင့် ခွဲပေးထားတဲ့ လူငယ်တွေဟာ အသက် ၂၅ နှစ်သားကနေ ၁၉ နှစ်သားအထိ လူငယ်လေးတွေဟာ ရေပန်းစားနေကြလေရဲ့ ။
တသက်လုံးက ပေါက်ကရ ခေါင်းစဥ်တွေ နဲ့ တိုင်းပြည်ဘဏ္ဍာသုံးဖြုန်းနေကြတဲ့ ခေါင်းစဥ်အမျိုးမျိုးအောက်က စားဖားကြီးတွေ ကား နေကြတာပေါ့ ။
FBI / CIA နဲ့ ပင်တာဂွန်ကိုပါ ချမ်းသာမပေးတဲ့ DOGE အဖွဲ့ကြောင့် ပြည်သူတွေကြား အလွန်ရေပန်းစားနေကြပါတယ် ။ ပေါက်ကရ လုပ်ခဲ့ကြတာတွေလည်း ကြည့်အုံးလေ....
- ပြေးစက်ပေါ်မှာ ပုဇွန်ဆိတ်က ဘယ်လောက်ပြေးနိုင်မလဲ သိရဖို့ သုတေသန လုပ်တာ ဒေါ်လာ ၃ သန်း တို့ ၊ တိရိစ္ဆာန်တွေကို လိင်ပြောင်းတာ ဒေါ်လာ သန်းပေါင်းများစွာ ကုန်တယ်တို့လို ပေါက်ကရ အလုပ်တွေ အများကြီးကိုးဗျ ။
ကျနော်ပြောချင်တာ ထရမ့်ရဲ့ သူ့တိုင်းပြည်အတွက် ပြောင်းလဲရေး လုပ်ငန်းစဥ်ကို တွေးကြည့်စေချင်တာပါ ။ သူတို့ စစ်ဆေးချင်တဲ့ လုပ်ငန်းတွေကို AI မှာ မေးကြည့်ကြတယ် ။ အဖြေကို YES or NO နှစ်မျိုးပဲ ပေးပါလို့ တောင်းဆိုပြီး မေးတာ ။
ဥပမာ USAID သည် အမေရိကန်အား အကျိုးရှိစေသလား.. ? အဖြေက NO ဆိုရင် အဲဒါ ဖျက်သိမ်း ။ ပြည်ပမီဒီယာလုပ်ငန်းတွေကို ထောက်ပံ့နေတာ အမေရိကန်အတွက် အကျိုးရှိပါသလား ..? အဖြေက No ဒါဆို ဖျက်သိမ်း .... အဲသလို ပြတ်ပြတ်သားသား ဆော်ပစ်တာဗျ ။
တာဝန်ပေးတော့လည်း ကြည့်အုံး အိုကြီး အိုမ စားနေကြ ကြောင်ဖားဝန်ထမ်းကြီးတွေကို တာဝန်မပေးဘူး ။ အထက်ကရေးခဲ့တဲ့ လူငယ် ပညာတတ်လေးတွေကို တာဝန်ပေးတယ် ။ မလိုအပ်တဲ့ ဝန်ထမ်း ကွန်ပြူတာနဲ့ ရှာတယ် တွေ့ရင် အလုပ်ထွက်ဖို့ နို့တစ်ပေးတယ် ၊ ငဖြူ ငညို မခွဲဘူး သူတို့အလုပ်ကိုသူတို့က တိတိကျကျ လုပ်ကြတယ် ။.
ကဲ အဲသလိုများ ကျုပ်တို့ တိုင်းပြည်မှာ မြန်မာ့ DOGE ဆိုပြီး လူငယ်တွေအများစု နဲ့ အဖွဲ့ ဖွဲ့မယ် ။ ပြီးရင် အားမနာတမ်း စစ်ဆေးကြပ်မက် ဆော်လိုက်ကြစို့ ဆိုရင်တော့...
- လက်တွေ့အသုံးချ အကျိုးရှိမယ့် နည်းပညာရလာဒ် လက်ဆုပ်လက်ကိုင် မပြနိုင်ကြတဲ့ သုတေသန ဌာနပေါင်းစုံ ( ပြနိုင်သူများ မပါ)
- ပြည်သူ့အကျိုးအတွက် လက်တွေ့ အလုပ် မလုပ်ပြနိုင်ပဲ ဟန်ပြ ဖွဲ့ရုံဖွဲ့ထားကြတဲ့ ကော်မတီ ပေါင်းစုံ
- တိုင်မှ အရေးယူပါ့မယ် ဆိုတဲ့ လာဘ်ပေး လာဘ်ယူတိုက်ဖျက်ရေးကော်မရှင်
( ပြည်သူ့အကျိုးအတွက် ဒါမျိုးတော့ အသွင်ယူ စုံစမ်း အရေးယူဖို့ ထိုးထွင်း မကြံစည်ပဲ ရုံးပေါ်ကပဲ ငုတ်တုတ်ထိုင် အမှုမျှော်နေတဲ့ အပျင်းကြီး တွေပေါ့ဗျာ)
- စာတိုက်လုပ်ငန်း ၊ စီးပွားကူးသန်း ၊ သမဝါယမ ၊ မီးရထား ၊ အစရှိတဲ့ လူအင်အားလျှော့လို့ ရမယ့် ဌာနတွေ ...
အမြဲလူရှုပ် အလုပ်ရှုပ် နေကြရတဲ့ လဝက / စည်ပင် / ပက်စ်ပို့ / ယာဥ်လိုင်စင်ဌာန. တွေကို ထိရောက်မြန်ဆန်အောင် အဆင့်မြင့် ကွန်ပြူတာတွေထပ်တပ်မလား...မလိုပဲ ရစ်လို့ရတဲ့ ကြိုးနီစနစ် ဖျက်သိမ်းမလား... မလိုပဲ ရစ်စိန်လုပ်နေတဲ့ ဝန်ထမ်းဖြုတ်မလား ......
အဲသလို အချက်အလက်မှန်တွေ သိနိုင်ဖို့ အပျံစား AI လိုမယ်မထင်ပေါင် ။ ရလာဒ်တွေနဲ့သာ ပိုင်းဖြတ်လိုက် ။ ဥပမာ အကြမ်းဖက် တိုက်ဖျက်ရေး ကော်မရှင် စစ်ဆေးကြည့် ၊၊ ဘယ်မြို့တွေ သင်တန်းပေးပြီးပြီလဲ ၊ ဘာလက်နက်တွေ တပ်ဆင်ထားလဲ မေးကြည့် ထိထိရောက်ရောက် မရှိတာ တွေ့ရလိမ့်မယ် ။ လိမ်နေကြတာ ခပ်တည်တည်ပဲ ။
အမေရိကန်ရဲ့ DOGE လိုမျိုး မြန်မာက အတုခိုးပြီး ဖွဲ့စည်း စီစစ်ကြည့်လိုက်ပါ အကောင်းဖက်တော့ ရွေ့လာမှာ သေချာတယ်ဗျ ။ စိုးရိမ်စရာရှိတာက. ဆော်ရင်း ဆော်ရင်း နဲ့ အဆောက်အဦး နဲ့ ပရိဘောဂလောက် ကျန်နေရင် ဘာလုပ်ရမလဲ ကြိုတွေးဖို့တော့ လိုမယ်ထင်တာပဲ ဗျို့ ။
ကိုရွှေမျိုးဝင်း
