⁉️Тугунан көмөлөһөбүт «Кыымҥа»?
Мин бэчээт – хаһыат, сурунаал эйгэтигэр үлэлээбитим 40-ча сыл буолла. Ол иһин бу дьыала ис туругун үчүгэйдик билэбин, өйдүүбүн.
Хаһыат, сурунаал, кинигэ улахан омуктарга үксүгэр информацияны тиэрдэр дьоһун оруолу оонньуур эбит буоллаҕына, биһиэхэ сахаларга норуот дьылҕатын, өйүн-санаатын, историятын түмэ сылдьар өйдөбүл. Ол иһин “Кыым” хаһыат биир-икки нүөмэрэ тахсыбата дьоҥҥо ыарыылаахтык дьайар. Чугас киһиҥ ыалдьыбытын курдук.
Ити биһиги, сахалар ураты духуобунаспытыттан тутулуктаах. Итэҕэйэрбит –хаһыат, үҥэрбит – кинигэ. Билигин дьоннор ийэлэрин, аҕаларын, эһэлэрин, эбэлэрин үйэтитээри бэйэлэрин харчыларыгыр кинигэ таһааттара сатыыллар. Ити мин өйдөбүлбүнэн киһини, олоҕу, тылы сыаналааһын биир көрүҥэ.
Билигин биһиги норуот быһыытынан “Айар” диэн биир улахан кинигэ оҥорор национальнай кыһалаахпыт, “Кыым” уонна “Саха сирэ” диэн сахалыы тыллаах хаһыаттаахпыт.
Кинилэр уратылара диэн икки суолунан баран иһэллэр. “Саха сирэ” судаарыстыбаннай, онтон “Кыым” – бэйэтин суолун бэйэтэ солонор. Билигин сыана үрдүү турдаҕына чааһынайга ыарахан. Үлэһиттэрин хамнастыыр, гонорар, аренда төлүүр, бэчээттэнэр кыһалҕалаах.
Билигин полиграфия – бэчээт, кырааска, кумааҕы сыаната бүтүннүүтэ суох үрдүү турар. Тугунан көмөлөһөбүт «Кыымҥа»?
Бастатан туран, бэйэбит сыһыаммытынан, сурутуунан. Билигин биһиэхэ элбэх чааһынай тэрилтэлэр, урбаанньыттар баар буоллулар. Кинилэр өйөбүллэрэ, көмөлөрө ирдэнэр.
Саха култууратын, историятын, духуобунаһын сүгэ сылдьар, саха дэриэбинэтин, тыатын сирин, тылын кытта ситимниир хаарыаннаах хаһыаппытын сүтэрэрбит сатаммат.
Борис Павлов, СӨ үтүөлээх суруналыыһа, суруйааччы, кинигэ таһаарааччы.
