Esse mavzusi:
Ba'zilar ortiqcha vazndan xalos bo'lish uchun jismoniy mashqlarni yaxshi desa,qolganlar oshqozon kichraytirish operatsiyasini ma'qullashadi.
Semizlik- XXl asrning eng dolzarb muammolaridan biri.Ayrim insonlar bu tashvishning yechimi sifatida jismoniy harakatlarni samaraliroq deb hisoblasa,boshqa bir toifa vakillari esa,oshqozonni jarrohlik yo'li bilan qisqartirishni eng maqbul yo'l deb bilishadi.Aslida,bu masalada zamonaviy tibbiyot yuqoridagi fikrlarni tasdiqlaydimi?
Mutaxassislar bergan ma'lumotlarga ko'ra, Yer yuzi aholisining har 8 nafaridan bittasi semizlikning turli darajalaridan aziyat chekmoqda.Bu esa semizlikning global miqyosda jiddiy muammo ekanligini bildiradi.Juda ko'p shifokorlar ortiqcha vazndan aziyat chekayotgan insonlarga jismoniy faol bo'lishni tavsiya qiladi.Inson sport bilan shug'ullanganda tanadagi muskullarda to'planib qolgan yog'lar erishi tezlashadi.Bundan tashqari, doimiy harakatdagi insonlar qolganlarga qaraganda kamroq vazn to'plashar ekan. ''Kasallikni davolagandan ko'ra,uni oldini olgan yaxshi'' degan naql borligi ham bejiz emas.Ammo semizlikdan qutulish uchun jismoniy faollik keksa va nogironligi bor shaxslarga noqulayliklar tug'dirishi mumkin.
Hozirgi tibbiyot ham bir joyda to'xtab qolmay,semizlikdan xalos bo'lish uchun turli yo'llarni taklif qilmoqda.Masalan,so'nggi yillarda yurtimizga jadal kirib kelayotgan bariatrik operatsiya usuli ham shular jumlasidandir.Bu usul orqali bemorlar tez vazn tashlashlari mumkin.Ushbu operatsiyalar odatda semizlikning og‘ir darajasiga , parhez va jismoniy mashqlar orqali vazn tashlashga erisha olmagan odamlarga tavsiya etiladi.Haqiqatan,bu yo'l tez ozishni xohlayotganlarni xursand qilishi mumkin ,ammo organizm birdaniga ko'p vazndan xalos bo'lsa,bu qo'shimcha kasalliklarni keltirib chiqaradi.Masalan,bir necha oy ilgari taniqli komik aktrisa Halima Ibragimova xuddi shunday muolajani olgan va bu operatsiya unga salbiy ta'sir ko'rsatib hatto o'limgacha olib borgani ijtimoiy tarmoqlarni larzaga soldi.Bu voqea insonlarni ''Och qornim -tinch qulog'im'' qabilida ish tutishga undagani ham ayni haqiqat.
Nazarimda, Semizlikni asta-sekinlik bilan jismoniy mashg'ulotlar va sog'lom ovqatlanish orqali davolash samaraliroq. Inson doimiy harakatda bo'lsa, ushbu kasallikka chalinish ehtimoli shuncha pasayishi hammaga kundek ravshan.
Xulosa sifatida shuni aytish mumkinki, Inson doimo, sog'lom turmush tarziga amal qilgandagina,bunday ayanchli tanlovlar oldida qolmaydi.Maboda, semizlik bilan kurashayotgan insonlar bo'lsa, sun'iylikdan qochib jismoniy harakatda bo'lsalar ,albatta, shifo topishadi.
©️Madaminov Quvonchbek
Farg'ona viloyati Qo'shtepa tumanidan
Kanalga obuna bo'lish:👇👇👇
@RESPUBLIKA_FILOLOGLARI
