#отчуот
✅ Далырга "Билайн" сибээһэ баар эрээри хааччыйыылара быстар мөлтөх, сайаапканы тута көрбөттөр, аккаастыыл- лара элбэх эбит. Кэнники "Мегафон" киирэн ааспыт сылтан сибээс тубуста, ол эрэн уот барда да сибээһэ суох хаалаллар.
Оскуола капитальнай өрөмүөнэ 2025 сылга былааннанан турар. Үбэ быһаарыллан үлэ барыахтаах диэн отчуоттуур бөлөх салайааччыта Петр Попов эттэ.
Александр Данилов олохтоох дьаһалтаҕа саҥа көрүллүбүт штатка киирэн, спорт инструкторынан үлэтин саҕалаабыт. Нэһилиэккэ спортсаалата суоҕун этиннэ.
42 сыл устата балыыһаҕа кочегарынан үлэлээбит, билигин бочуоттаах сынньалаҥҥа олорор Михаил Андылыров урукку сэбиэскэй кэмҥэ 15 куойкалаах балыыһа үлэлээбитин санатан туран, билигин ФАП буолан турарын, өрүс уҥуоргу нэһилиэктэр олохтоохторо сытан эрэ эмтэнэллэригэр куойкалаах балыыһа наадатын этиннэ.
Маны тэҥэ нэһилиэккэ оттук боппуруоһа сытыытык турарын, заправка суоҕун, от-мас тиэйиитигэр ыыппыт күчүмэҕэйдэри көрсөллөрүн этиннэ. Оттуур сирдэри бас билээччилэр суох да буолбуттарын кэннэ сир нэһилиэстибэ курдук оҕолоругар, сиэннэригэр ананан бара турарын, онуоха чахчы оттуур баҕалаах дьон чугас эргин сирэ суох буолан сүөһү ахсаанын сарбыйыы тахсарын иһитиннэрдэ.
"Доруобуйа харыстабыла" национальнай бырайыак 2024 сылынан үлэлээн бүттэ, ол оннугар "Көхтөөх олохтоох уһун үйэлэнии" саҥа бырайыак үлэтин саҕалаата. Маныаха уочарат быһыытынан хаарбах туруктаах доруобуйа харыстабылын эбийиэктэрин сөргүтүү, саҥа үлэ дьиэлэрин тутуу үлэлэрэ ыытыллаллара былааннанар. Манан сибээстээн Хоро уонна Далыр нэһилиэктэригэр 2027-2028 сылларга быраас амбулаториялар тутулларын былаана ылыллан турарын туһунан эттилэр.
Өрүс уҥуоргу нэһилиэктэргэ урукку сылларга аптека боппуруоһа сытыытык турар эбит буоллаҕына, билигин номнуо сытан эрэ эмтэнэр балыыһа боппуруоһа турбутун бэлиэтээтилэр. Хонуктаах, сытан эрэ эмтэнэр балыыһа Хоро нэһилиэгэр тутуллара былааҥҥа баарын отчуоттуур бөлөх иһитиннэрдэ.
"Үөһээ Бүлүү" хаһыат
