Markaziy Osiyo: Mintaqaviy Hamkorlikning Yangi Bosqichi
So‘nggi yillarda Markaziy Osiyo davlatlari o‘rtasidagi munosabatlarda sifat jihatidan tub burilish yuz berdi. Ilgari mintaqadagi davlatlar o’rtsida chegara, suv resurslari va iqtisodiy aloqalarga oid muammoli mintaqaviy munosabatlar endilikda ochiq muloqot, o‘zaro manfaatli sheriklik va amaliy hamkorlikka asoslangan yangi bosqichga ko‘tarildi.
Jahon siyosatida tobora muhim strategik hududga aylanib borayotgan Markaziy Osiyoda mintaqaviy birdamlik va integratsiya jarayonlarini chuqurlashtirish ustuvor yo‘nalishlardan biriga aylandi. Tabiiy resurslarning boy zaxirasi, global savdo va tranzit yo‘llarining kesishgan hududi sifatidagi ahamiyati mintaqaning xalqaro hamjamiyat uchun dolzarb ekanligini yana bir bor tasdiqlaydi.
Shu sababli, mintaqaviy integratsiya jarayonlarini chuqurlashtirish va barqaror rivojlanish yo‘lida hamkorlikni mustahkamlash ustuvor vazifalardan biri bo‘lib qolmoqda.
Ushbu jarayonda O‘zbekiston mintaqaviy siyosatning faol ishtirokchisiga aylanib, o‘z tashabbuslari bilan davlatlararo hamkorlikni mustahkamlashda yetakchi o‘rin tutmoqda. Prezidentimiz tomonidan olib borilayotgan tashqi siyosat ochiq muloqot va konstruktiv yondashuv Markaziy Osiyoda o‘zaro ishonch muhitini mustahkamlashga xizmat qilmoqda.
31-mart kuni Xo‘jand shahrida O‘zbekiston, Qirg‘iziston va Tojikiston prezidentlari o‘rtasida bo‘lib o‘tgan uch tomonlama uchrashuv mintaqaviy hamkorlikda muhim qadam bo‘ldi. Ushbu tarixiy uchrashuv davomida uch davlat chegaralarining tutash nuqtasi bo‘yicha kelishuvga erishildi va Qo‘shma deklaratsiya imzolandi.
Bu uchrashuv mintaqaviy integratsiyani yanada jadallashtirishga xizmat qiladi. Chegara masalalarining tinch yo‘l bilan hal etilishi, iqtisodiy va infratuzilma loyihalarida yaqin hamkorlikning kengayishi hamda o‘zaro ishonchning oshishi Markaziy Osiyoning barqaror taraqqiyoti uchun muhim asos bo‘lib xizmat qiladu.
Ushbu jarayon shuni ko‘rsatmoqdaki, Markaziy Osiyo davlatlari o‘zaro manfaatli sheriklik orqali mintaqaviy hamkorlikni mustahkamlash, iqtisodiy taraqqiyot va xalq farovonligini ta’minlash yo‘lida izchil va ishonchli qadam tashlamoqda.
@Shaxnoza_Xolmaxamatova
