😇 Кырачаан киһи "мин кэллим" диэбиттии бэбээрэн күн сирин көрөрө дьоһуннаах олох олорууга киһи саамай үрдүк дьоло, үөрүүтэ, олоҕун салгыыта буолар.
Ол курдук, бүгүҥҥү бэлиэ күҥҥэ - тапталлаах Үөһээ Бүлүүбүт төрүттэммитэ 90 сыллаах үбүлүөйдээх күнүгэр оҕо төрүүр дьиэтиттэн икки ийэ оҕолонон таҕыста. Үөһээ Бүлүү сэлиэнньэтигэр уонна Үөдүгэй нэһилиэгэр биирдии кырачаан эбиллиннэ.
Ол курдук, Саргылаана Михайловна, Иван Артурович Максимовтар уһүс уол оҕолонон уонна Айыллаана Александровна, Никита Валентинович Семеновтар үһүс кыыс оҕолонон төрүүр дьиэттэн тахсар күннэрэ ураты дьоллоох түгэн буолла.
🔹 Саҥа кырачааннардаммыт эдэр ыаллары социальнай боппуруостарга уонна дьиэ кэргэн политикатыгар улуус баһылыгын солбуйааччыта Анна Михайловна Уларова, улуустааҕы киин балыыһа кылаабынай бырааһа Сардаана Николаевна Павлова, "Россия ийэлэрэ" уопсастыбаннай түмсүү Үөһээ Бүлүүтээҕи салаатын салайааччыта, үрдүк категориялаах гинеколог быраас Людмила Тимофеевна Долгунова эҕэрдэлээтилэр.
🔹 Үөһээ Бүлүүтээҕи гражданнар туруктарын туһунан аактаны толорор салаа салайааччыта Татьяна Егоровна Кардашевская олунньу 2 күнүгэр төрөөбүт кырачаан кыыска бастакы докумуонун - төрөөбүтүн туһунан туоһу суругу Семеновтар дьиэ кэргэттэригэр туттарда.
🔹 Санатар буоллахха, бу ааспыт 2024 сылга Үөһээ Бүлүү оройуонугар 203 оҕо күн сирин көрбүт, олортон 105 уол, 98 кыыс.
Үөһээ Бүлүү кэтит кэскилин кэҥэтэр эдэр элбэх оҕолоох үтүө-мааны ыал буоларгытыттан биһиги үөрэбит уонна эһиги дьиэ кэргэттэргитигэр кытаанах доруобуйаны, өйдөһүүну, өйөнсүүнү, истиҥ-сылаас сыһыаны,ыраас тапталы баҕарабыт!
Салайааччы Т.Е. Кардашевская
@sakhazags
