"SQB jamoasini g‘alaba bilan tabriklayman. Bugun bizga omad yetishmadi, deya olaman. Sababi ko‘plab imkoniyatlardan unumli foydalana olmadik. Buning ustida ishlaymiz.

Bugun ikkinchi davraning birinchi uchrashuvi edi, kim biladi, balki umumiy omadsizligimizning sabablaridan biri yo‘l charchog‘i bo‘lgandir.

Nima bo‘lganda ham, keyingi o‘yinlarga tayyorgarlik ko‘ramiz va yana g‘alaba qozonish uchun borimizni beramiz.

Tajribali futbolchilar bilan tajribasiz o‘yinchilarning farqi ham shunda bo‘ladi-ki, tajribali sportchilar vaziyatning keyingi qismi nima bilan tugashini ko‘rib, bilib turadi. Shuning uchun ham ular yoshroq jamoadoshlariga maslahat berib, qo‘llab turishi kerak. Biroq bugun ba’zi yigitlarimiz shunda ham yoshligiga borishdi va xatoga yo‘l qo‘yildi.

Standart vaziyatlardan ko‘p gol o‘tkazib yubordik — shu jihat ustida yaxshilab ishlashimiz kerak, deb hisoblayman. Shuningdek, o‘ynovchi darvozabon bilan o‘ynashga ham ko‘proq e’tibor berishimiz kerak. Avvallari o‘ynovchi darvozabon xizmatidan ko‘p foydalanrdik. Ammo hozircha bunday imkoniyatlarga ega kiperga ega emasmiz.

Bugungi gollarda darvozabonimiznigina ayblamagan bo‘lardim. Bilasizmi, har bir o‘tkazib yuborilgan gol — butun jamoaning xatosidan kelib chiqadi".

"Juda qiziqarli uchrashuv bo‘ldi. Biz ushbu bahslarga bir oy davomida tayyorgarlik ko‘rdik. Avval boshidan, biz maqsad sari asta-sekinlik bilan harakat qilishni niyat qilganmiz. To‘g‘ri, bugun ba’zi xatolar bo‘ldi, lekin umumiy olganda, shogirdlarim o‘yinidan qoniqish hosil qildim. Yigitlar murabbiylar shtabi bergan vazifalarni bajara olishdi.

Bizning oldimizga har bir o‘yinni yutish vazifasi qo‘yilgan. Raqib kim bo‘lishining ahamiyati yo‘q, uyog‘ini vaqt ko‘rsatadi.

Kubokda tarkibimizning 70% havaskorlardan tashkil topgan, barcha sirlarni ochib tashlashni istamayman, lekin ishontirib aytamanki, SQBning tarkibi chempionat startigacha ancha o‘zgaradi".