Сирдарёда Хитой фуқаросининг бир оғиз гапи билан ҳокимият вакили маҳкамага тортилмоқда.
Асос ва даллилар мавжуд эмас!
Вилоят судидан адолат кутамиз!
Сўнгги кунларда мамлакатимизда ижтимоий тармоқлардан тортиб, бозорлар, тўй-маърака ва одамлар йиғиладиган жойларда айрим хабарлар тарқалмоқда. Гўёки, Ўзбекистонда Хитой фуқаролари жуда кўпаяётгани, улар барча ерларни сотиб олаётгани ҳақида гап-сўзлар авж олган. Бу масала расмий оммавий ахборот воситаларида ҳам ёритилмоқда. Бош вазир Абдулла Ариповнинг матбуот котиби хавотирга ўрин йўқлигини таъкидлаганига қарамай, муҳокамалар тўхтамаяпти.
Айни вақтда Сирдарё вилоят суди жиноят ишлари бўйича апелляция босқичида кўрилаётган ишда иштирок этмоқдаман. Суд жараёнида Ўзбекистон фуқароси, ҳокимият ходими Додоев Қодирнинг манфаатларини ҳимоя қиляпман. Жиноят иши судьялар Ж.Жабборов, А.Кураматов ва Ў.Жумаевлар томонидан кўриб чиқилмоқда.
Ишнинг моҳияти
Жиноят ишлари бўйича Сайхунобод туман суди ҳукмига кўра, Хитой Халқ Республикаси фуқароси инвестор сифатида Ўзбекистонга келиб, Сирдарё вилоятида бино-иншоотлар жойлашган ер майдонларини сотиб олмоқчи бўлган. Додоев Қодир ҳокимият ходими сифатида унга Ўзбекистон қонунчилиги доирасида тушунтиришлар берган ва ёрдамлашган. Бироқ, таржимонлик қилган шахснинг нотўғри таржимаси ва ҳаракатлари туфайли, Додоев ҳозирда судланувчининг ўриндиғида ўтирибди.
Биринчи босқич суди Хитойлик фуқаронинг ҳеч қандай далилсиз берган кўрсатмасига асосланиб, Додоев Қодирни Ўзбекистон Республикаси Жиноят кодексининг 168-моддаси (фирибгарлик) бўйича айбли деб топган. Ҳолбуки, иш материалларида Додоевни мазкур жиноятга алоқадорлигини тасдиқлайдиган бирорта ҳам ишончли далил мавжуд эмас. Фақатгина Хитойлик тадбиркорнинг шахсий фикри ва кўрсатмаси бор.
Суд жараёнидаги зиддиятлар
Хитойлик фуқаро Додоев Қодиров ундан пул олганини таъкидлаган, бироқ, сўроқ пайтида у пулларни таржимонига берганини ва бу маблағлар айнан Додоевга етказилганига аниқ далил йўқлигини тан олди. Яъни, судланувчини айблаш учун асос бўлган ягона далил – даъвогарнинг шахсий тахмини, холос.
Айбловни тасдиқлайдиган ҳеч қандай аудио, видео, ёзма тилхат, хат-хабарлар ёки гувоҳлар мавжуд эмас. Шу билан бирга, Сайхунобод туман суди ушбу гумонга асосланиб, Додоевни 9 йил озодликдан маҳрум этиш ва у олмаган пул маблағларини Хитойлик фуқаро фойдасига ундириш ҳақида ҳукм чиқарган.
Адолат қарор топиши шарт!
Ҳозирда Сирдарё вилоят суди ишни яна бир бор кўриб чиқмоқда ва ҳимоячи сифатида менга ҳақиқатни аниқлаш учун барча имкониятлар яратилмоқда. Шу боис, вилоят судига ҳозирча ташаккур изҳор этаман.
13 март куни бўлиб ўтган суд мажлисида Хитойлик фуқаронинг кўрсатмалари эшитилди. У саволларга жавоб бера туриб, Додоев пул олганлиги ҳақида аниқ далил йўқлигини, фақатгина шундай фикрга келганини таъкидлади. Бу ҳолат Сайхунобод туман суди ҳукмининг ноадолатли бўлганини яққол намоён қилади.
Жорий йилнинг 5 март куни Коррупцияга қарши курашиш миллий кенгаши йиғилишида Президент: “Барча раҳбарларни қатъий огоҳлантираман. Судлар фаолиятига ҳар қандай аралашиш одил судловга соя солиш, деб баҳоланади. Бу бўйича сўров ҳам, жавобгарлик ҳам қаттиқ бўлади”, – деб таъкидлади.
Ишонамизки, мазкур ишга ҳеч қандай ташқи таъсир ўтказилмайди. Биз эса Сирдарё вилоят судидан адолатли қарор кутишда давом этамиз!
Завқиддин Амонов
юридик фанлар номзоди, адвокат
