“Kimsiz o‘zi va nima bilan shug‘ullanasiz?” savoliga javob.
Bugun sizlarga o‘z professional yo‘lim haqida qisqacha gapirib bermoqchiman.
Hammasi volontyorlikdan boshlangan. 16 yoshimda juda istiqbolli yoshlar jamoasiga qo‘shilib, Navoiy kutubxonasida Speaking Club va bepul ingliz tili kurslarini yuritganmiz. Men uchun asosiy bilimlar aynan o‘sha davrlarda boshlangan deb hisoblayman.
Keyin AKFA Group’da ish boshladim. Avval sotuvchi, keyin HR va rekruitingga o‘tdim. Xodimlar motivatsiyasi menga qiziq tuyulib, tog‘da dam olish zonasi loyihasida qatnashdim. O‘sha paytda marketing bo‘limiga o‘tishga harakat qilganman, lekin nimagadir olib qolishmagan.
Shu sabab boshqa kompaniyaga o‘tdim va bolalar tagliklari brendining marketingi bilan shug‘ullandim. Esimda, o‘shanda tug‘ruqxonalarga bepul pamperslar tarqatganmiz. Mazza davr bo’lgan.
Keyinchalik kosmetika bo‘yicha onlayn do‘kon marketingini yuritdim. 2013–2014 yillarda bu juda ilg‘or loyiha edi, o‘sha vaqtda onlayn savdo endi-endi rivojlanayotgan edi.
Keyinroq ko‘proq masshtab va ijod qilish istagi bilan 8BIT marketing agentligiga ishga o‘tdim. U yerda yirik va kichik brendlar bilan ishladik. Eng sevimli loyihalarim: Evos, Pepsi, OLX, Adrenaline Rush.
21 yoshimda agentlikda hamkor bo‘lib, boshqaruvga kirishdim. O‘shanda tadbirkorlik qanchalik murakkab ekanini anglaganman. Juda ko‘p xatolar qilganman, lekin aynan shu xatolar eng katta tajribam bo‘lgan.
Parallelno blog yuritardim, biznes doiralarda faollik qilardim, hatto biznes nashrda jurnalist bo‘lishga ham harakat qilganman. Xullas, hamma imkoniyatlardan foydalanishga harakat qilardim.
2020-yil men uchun burilish davri bo‘ldi. IT sohasiga o‘tdim. Express24’ga ishga kirdim va aynan shu yerda Product Management’ga oshiq bo‘ldim.
Shu davrda Product community’ga ham asos solganman. Hozirgacha ko‘plab aqlli va ilhomlantiruvchi insonlar bilan tanishib kelayapman.
2023-yilda TechWomen dasturi orqali AQShga bordim, Oracle kompaniyasida AI yo‘nalishida stajirovka o‘tab keldim.
Hozirda o‘z loyihalarim bilan shug‘ullanaman — startaplar (Botifi hamda Monifi), konsalting va treninglar yo‘nalishida ishlayman. Ko‘plab jamoalarga Customer Development metodikasini o‘rgatdim, foydalanuvchi tadqiqotlariga asoslangan qarorlar qabul qilishni targ‘ib qilaman.
Xullas, doim harakatdaman!
Kanalga a’zo bo‘lganingiz uchun rahmat!
