Rasmiy munosabat
Ayrim internet nashrlari hamda ijtimoiy tarmoqlarda Toshkent davlat iqtisodiyot universitetida sirtqi ta'lim shaklida tahsil olayotgan talabalarning shartnoma to‘lovlari muddati yuzasidan xabarlar paydo bo‘ldi.
Mazkur holat yuzasidan shuni ma'lum qilamizki, ayni vaqtda Toshkent davlat iqtisodiyot universitetida
46 mingdan ziyod talaba kunduzgi, sirtqi, kechki, masofaviy hamda ikkinchi oliy ta'lim shaklida tahsil olmoqda. Shuningdek, to‘lov-shartnoma asosida tahsil olayotgan talabalar uchun to‘lov shartlari va muddatlari shartnomada ko‘rsatib o‘tilgan. Ushbu shartnomalarni talabalar maxsus platforma orqali onlayn oladilar. O‘z navbatida shartnoma shartlarida ko‘rsatilgan muddatlarda belgilangan miqdordagi to‘lovlarni o‘z vaqtida amalga oshirmagan talabalar uchun muntazam ravishda qo‘shimcha imkoniyatlar taqdim etib kelinmoqda.
Murojaatda ko‘rsatilgan video yozuvdagi holatda sirtqi ta'lim shaklida tahsil olayotgan talabalar o‘quv jarayonlarini yakunlab, yakuniy nazorat topshirmoqda. Universitetda ta'lim sifatini ta'minlash, yakuniy nazoratlarni shaffof, adolatli o‘tkazish maqsadida maxsus kuzatuv kameralari yordamida va mutaxassislar nazorati ostida test topshiriladi. Ushbu yakuniy nazoratlar universitet tomonidan tasdiqlangan o‘quv grafigi asosida kurslar, guruhlar kesimida belgilangan muddatlarda amalga oshirilmoqda. Ya'ni xabarda ta'kidlanganidek, talabalar shartnoma to‘lovlari uchun emas, balki yakuniy nazorat jarayonlariga kirishga tayyorlanib turgan holat aks etgan (har kuni minglab talabalar yakuniy nazorat topshirmoqdalar).
Hozirgi kunda sanoqli talabalargina shartnoma to‘lovining 75% dan kam miqdorida amalga oshirgan bo‘lishi mumkin – ularning soni videoda aks ettirilganidek ko‘p emas Shuningdek, imtihon jarayonlarida talabalarni sun'iy yiqitish holatlari mavjud emasligini ham alohida ta'kidlab o‘tamiz. Qayd etish kerakki, imtihondan yiqilgan talabalarga qayta yakuniy nazorat jadvallari asosida qayta topshirish imkoniyati yaratib berilmoqda.
Toshkent davlat iqtisodiyot universitetida har bir talabaning shaxsiy erkinligi, qadr-qimmati ahamiyatli bo‘lib, talabalarning fikrlari va takliflari universitet mas'ullari uchun muhimdir. Shuning uchun, talabalar o‘z muammolarini hal etish maqsadida universitet rahbariyatiga bevosita murojaat qilishlari mumkinligini yana bir bor eslatib o‘tamiz.
🇺🇿 TDIU Axborot xizmati
@ofis_registratori
