Динни ўзингизга эмас, аксинча ўзингизни динингизга мослаштиринг
Расулуллоҳ соллаллоҳу алайҳи ва салламнинг энг суюкли аёллари, барча мўмин ва мўминаларнинг онаси Хадича розиаллоҳу анҳо муваффақиятли сармоядор ва тадбиркор аёл бўлганлар, лекин у кишининг бошқа кўплаб сифат-фазилатларини эсдан чиқариб айнан шу жиҳатларига урғу бериш керак эмас.
Бугунги кунда баъзи опа-сингилларимиз Хадича онамизнинг тадбиркорлик фазилатларига ишора қилиб, ўзларининг бойликка, фаровон ҳаётга бўлган ҳавасларини, "шахсий бренд" қуриш истакларини ёки машҳурликка интилишларини оқлашга уринишмоқда.
Ижтимоий тармоқлар рўмолли ва рўмолсиз опалар билан тўлиб-тошди, лекин уларнинг тафаккури ва дунёқараши Хадича розиаллоҳу анҳоникидан анча узоқ.
Улар у киши ҳақида, «Хадича (р.а) сармоядор бўлганлар, бой бўлганлар, молиявий ютуққа ўз кучлари билан эришганлар....» дейишади ва бу билан Хадича (р.а)нинг барча сифатларидан фақат шу қисмини ажратиб олиб, ундан ўз мақсадларида фойдаланишга уринишади.
Лекин, Хадича розиаллоҳу анҳо биринчи навбатда бойликлари билан эмас, балки хулқлари билан танилганлар. У киши иймонга келишларидан олдин ҳам “Тоҳира”, яъни пок, ор-номусини сақловчи, иффатли, ҳалол аёл деб ном чиқарганлар ва айнан шу сифатлари билан қабиладошлари орасида чуқур ҳурмат ва эҳтиромга сазовор бўлганлар. Исломга кирганларидан кейин эса чуқур иймон ва тақво соҳибаси сифатида ҳам танилдилар.
У киши
– гўзал хулқли, олийжаноб ва саҳий аёл;
– севувчи ва садоқатли турмуш ўртоқ;
– ғамхўр она;
– Пайғамбар ﷺ га биринчи бўлиб иймон келтирган аёл;
– мусибатларга бардошли;
– ўз уйини иймон масканига айлантирган инсон бўлганлар.
Кўриб турганимиздек, у кишининг кучи биринчи навбатда катта бойликда эмас, балки гўзал хулқ, кучли иймон, ва Яратувчига бўлган тўлиқ суянч/таваккулда бўлган.
Азиз опа-сингиллар, Хадича онамизнинг бой бўлганликларини эслаш, у кишининг бу жиҳатларидан ўз мақсадингиз йўлида фойдаланишдан аввал, у кишининг хулқи ва иймонини эсланг.
↗️ @IslomMoliyasi
