«Атырау» бас менеджері елордадағы ҚФФ жиналысына қатысты
Қазақстан футбол федерациясының (ҚФФ) президенті Марат Омаров Премьер-лига мен Бірінші лига клубтарының басшыларымен жұмыс кездесуін өткізді. Елдегі кәсіби футболды дамытуға бағытталған стратегиялық бастамалар таныстырылған басқосуға “мұнайшылардың” бас менеджері Манарбек Ержанов та қатысты.
Кездесуде қозғалған басты мәселелердің бірі – ҚФФ аясында өтетін жарыстар жүйесін реформалау. Марат Омаров федерация мен клубтар арасындағы тығыз байланыс орнатудың маңызын атап өтіп, отандық футболды тек бірлесе отырып жаңа деңгейге көтеруге болатынын айтты.
Жиында ҚФФ басшысы жарыстарды ұйымдастыру дирекциясын таныстырып, чемпионаттағы басты өзгерістерге тоқталды. Соның ішінде клубтар үшін қаржылық жарналардың азайтылуы мен чемпионат атауынан беттинг компанияларының алынуы айтылды.
Сондай-ақ, төрешілік, демеушілік және аймақтық футболды дамыту мәселелері де талқыланды.
