Бир ҳафтаки, «Реал» камбэк истаги билан яшаяпти, кечадан бу муҳит янаям кучайди, ҳали стадионда ҳам мухлислардан катта tifo ҳам кўрмак керак, қисқаси, ростанам уч тўп фарқини йўқотишмоқчи улар. Жиддий.
Ўйлаб кўрдим, гап «Реал»дами? Йўқ, менимча. Назаримда, агар «Ливерпул», «Барселона», «Манчестер Сити» ёки «Бавария»дан 0:3 ютқазиб келинганда, бу ҳақида бунчалик кўп гапирилмасди. Жамоа тақдирга тан бергандек бўларди, ҳа, худди кечаги «Боруссия» каби кучли стартни режа қилар, ўхшаб қолса, балким ҳаммаси жиддийлашарди, лекин ўйин олдидан ҳозиргидек кайфият бўлишига ишонмайман. «Реал» деярли ютқазиб бўлган бўларди биринчи ўйинда.
Ҳа, гап «Арсенал»да. Лондонликлар узоқ йиллар топ-клуб бўлмай қолишди, Европада қачон жиддий қаралганиям эсдан чиқди. Артета билан улар Англияда аллақачон чемпион жамоага айланиб бўлган, доимий даъвогарлиги оддий ҳол бўлса-да, Европа бошқа. Юқоридаги жамоаларни бекорга санамадим, улар айнан Европада жиддий куч ҳисобланишади, «Арсенал» эса ҳали у даражага чиқмади. Шунинг учун ҳам «Реал» 0:3 ютқазиб келиб ҳам камбэк қилмоқчи, тезкор голмией, ремонтадамией, тинчишмаяпти. Хуштак чалиниши билан гол уришга югуради, аниқ. Аслида кўпроқ интрига Миландаги ўйинда бўлса-да, эътиборни Мадридга кўчиришни уддалашмоқда.
Шу жиҳатдан «Арсенал» учун ҳам бугун ҳал қилувчи палла. Европада дадил қадам ташлаш учун ҳам бугунги ўйин муҳим. Йўқ, яримфиналга чиқишни айтмаяпман. «Реал»дан ўтишни айтяпман.
Бугунги шу босимдан салобат билан ўтиб олса, «Арсенал» бирданига яримфиналдаги яна бир кучга айланади, у билан келаси йил ҳам ҳисоблашишади. Агар ўтолмаса, ишонаверинг, тасаввур қилиш қийин - жамоа мемга айланади, Райснинг тарихий голлари тасодифга чиқади, яна жиддий олмай қўйишади. АПЛда чемпионликни янги мураббийга бой берган жамоа мавсумдаги иккинчи зарбани кўтара оладими, қачон ва қандай қайтади, айтиш қийин. «Камп Ноу»да 1:6 дан кейин то қачонгача «ПСЖ» мем жамоа бўлиб келди, эслаб кўринг.
Қизиғ-а, «Реал»дан ўтолмаса, «Арсенал» шарманда бўлади. «Реал»дан ўтолмаганлар кўп-ку - ҳамма! Начора, «Арсенал»нинг ўзи шартларни шунга олиб келиб қўйди. Дуранг ўйнаб қўя қолмасмидинг. Осон эмас бу майдон узра турмоқ...
@aslanov_futbol
