Bugun Sirdaryoda Axborot va ommaviy kommunikatsiyalar agentligi tashabbusi bilan «O‘zbekiston – kitobxonlar yurti» shiori ostida o‘tkazilayotgan V Respublika «Kitobxonlik haftaligi»ga start berildi.
Haftalik oldidan Alisher Navoiy nomidagi Sirdaryo viloyati axborot-kutubxona markazida OAV vakillari, blogerlar uchun matbuot anjumani o‘tkazildi. Unda haftalik doirasida amalga oshiriladigan ishlar, tashkillashtirilgan loyihalar, adabiy tadbirlar, uchrashuvlar hamda kitob yarmarkalari xususida atroflicha maʼlumot berildi.
Shundan so‘ng «Kitobxonlik haftaligi»ning ochilish marosimi bo‘lib o‘tdi. Marosimda axborot-kutubxona markazlari mutaxassislari, yozuvchi va shoirlar, yosh kitobxonlar, keng jamoatchilik hamda ommaviy axborot vositalari vakillari ishtirok etdi.
Viloyat hokimi o‘rinbosari Shoxrux Isakulov qatnashchilarni kitob bayrami bilan qutlab, bu kabi ommaviy tadbirlar aholi, ayniqsa o‘sib kelayotgan yosh avlodni kitobga oshno qilishda, kitobxonlik, mutolaa bilan tafakkurni yana-da yuksaltirishda beqiyos ahamiyatga egaligini taʼkidladi.
Arzonlashtirilgani kitob-savdo yarmarkasi, shoir va yozuvchilar bilan muloqotlar, turli intellektual viktorinalar yig‘ilganlarda katta qiziqish uyg‘otdi.
Shuningdek, viloyat “Maqom” ansambli ijrosida kuy va qo‘shiqlar yangradi. Sahna namoyishlari, jumladan, viloyat musiqali drama teatri aktyorlari hamda Halima Xudoyberdiyeva ijod maktabi o‘quvchilarining chiqishi tadbirga alohida mazmun baxsh etdi.
Tadbir doirasida kitobsevar o‘quvchilar uchun viloyat axborot-kutubxona markazi bo‘ylab sayohat tashkillashtirildi.
