АмкIышъэмрэ Пылымрэ
АмкIышъэ цIыкIум набгъо ышIи щырхэр къырищыгъэх. Псашъо кIо зыхъукIэ, а чIыпIэм мафэ къэси Пылыр блэкIыщтыгъэ. Зэгорэм ылъэкъо шъомбгъошхокIэ АмкIышъэ набгъом ылъэгъу пэтзэ теуцуи, бзыущыр цIыкIухэр ыщытIагъэх.
— Арэущтэу зыкIэпшIагъэр, кIуачIэ симыIэу, сыгъусэнчъэу, сытхьамыкIэу укъысэплъышъ арын фае, — ыIуи АмкIышъэр гъыгъэ.
— ПшIэн зыфапIорэм уфит, — Пылым ыIуагъ. — Сэ сышъэджашъ, сылъэш, хэти сытекIо! О, уIэе-Iуежъ цIыкIу, сыд о пфэгъэхъэн!
— Ащыгъум непэ щегъэжьагъэу тызэрэзэпыир зыщымыгъэгъупш! — ыIуагъ АмкIышъэ цIыкIум.
НэмыкI бзыу цIыкIумэ адэжь быби ялъэIугъ:
— Пылым сищырхэр ыщытIагъэти пыи тызэфэхъугъ, гъусэ шъукъысфэхъуи сытежъугъакIу.
— Сыдэущтэу тишIуагъэ одгъэкIын тлъэкIына? Сыд фэтшIэна? Пылым тытекIон тлъэкIына тэ?! — къыраIуагъ.
— Убэмэ — улъэш, тытекIощт! ЗэкIэ тызэгъусэу тытебэнэнышъ ынэхэр итыутыных, — ари1уагъ АмкIышъэм.
Арэущтэу ашIыгъ.
Бзыу цIыкIоу мэзым хэсхэри, губгъом исхэри, къамылым хэсхэри зэрэугъоихи Пылым тебанэхи, еохэзэ ынэхэр раутыгъэх. Пыл шъэджашъэр нитIунэшъоу къагъэнагъ.
ЕтIанэ Пылыр псашъо зыдакощтыгъэ псыхъом АмкIышъэр быбыгъэ. Быби, хьантIаркъоу ащ хэсхэр зэкIэ ыугъопгъэх.
Ыугъоихи, ялъэIугъ:
— Пылым сищырхэр зэрищытIагъэм фэшI пыи тызэфэхъугъ. Ащ пае гъусэ шъукъысфэхъури сытелжъугъакIу.
— Сыдэущтэу тишIуагъэ одгъэкIын тлъэкIына? Сыд фэтшIэна? Пылым тэ тытекIон тлъэкIыиа? — аIуагъ. — Ар ины дэд, тэ тыцIыкIу дэд. ТытекIошъунэп!
— Узэгъусэмэ — улъэш, тызэгъусэмэ — тытекIощт! Тэ бзыухэр тызэхахьи, Пылым ынэхэр итыути нэшъу тшI1э, шъуикъэкъэ макъэ зэхихынъшъ псым къыхэхьащт. Ащ куоу зы сэе чIыпIэ горэ иIэшъ, ащ шъукIуи, щъо шъуикъэкъэ макъэ къекIузэ, а чIыпIэм хашъущэри хэжъугъан, хэжъугъэкIуад, — ыIуагъ.
АмкIышъэм зэриIуагъэу хантIаркъохэр сэягъэм зэлъекIухи, зэдрагъаштэу къакъэхэ зэхъум, Пылыр ащ къекIугъ. Къызек1ум, орыжъ сэягъэм хэнагъ.
— Адэ джы, Пылыр, сыдэущтэу узэплъыжьырэ, о хэти унахь лъэша? — ыIуи АмкIышъэр еупчIыжьыгъ.
Пылым зи къыIожьыгъэп.
Цэй И. – Адыгэ Пшысэхэр, 1965 илъ.
