Геймдырэктарка Dragon Age: The Veilguard Карын Бушэ пакіне BioWare у бліжэйшы час, як пацвердзілі крыніцы Eurogamer. Бушэ працавала ў EA каля 18 гадоў, прычым большую частку гэтага часу яна займалася серыяй The Sims. З пачатку 2022 года Бушэ сумесна з творчым дырэктарам Джонам Эплерам займалася распрацоўкай і давядзеннем да рэлізу The Veilguard.
Пасля таго як інфармацыя пра яе сыход з’явілася ў СМІ, Бушэ пацвердзіла, што сапраўды пакідае кампанію. Паводле яе слоў, яна атрымала прапанову, “ад якой немагчыма было адмовіцца”. Пры гэтым яна застаецца ў індустрыі і працягне працаваць над RPG.
Бушэ адзначыла, што яе асноўная задача была выканана: яна разам з камандай давяла The Veilguard да рэлізу. Яна падкрэсліла, што гэта не часта здараецца з гульнямі, якія сутыкнуліся з вялікай колькасцю праблем падчас распрацоўкі. Аднак яна таксама прызнала, што культура працы ў BioWare патрабуе паляпшэнняў, асабліва ў пытаннях кранчаў (празмернай працоўнай нагрузкі). Пры гэтым яна лічыць, што студыя рухаецца “ў правільным кірунку”.
Паводле звестак Eurogamer, сыход Карын Бушэ не звязаны з фінансавымі паказчыкамі гульні. Іншыя змены ў BioWare на дадзены момант не плануюцца. Уся каманда, якая працавала над The Veilguard, цяпер засяроджваецца на распрацоўцы наступнай часткі Mass Effect.
Дадзеных аб продажах The Veilguard пакуль няма.
