Бүгүн Бүлүү улууһугар ситэриилээх былаас уорганын 2024 сыллаҕы үлэтин отчуота саҕаланна. СӨ Быраабыталыстыбатын бэрэссэдээтэлин солбуйааччы Сергей Васильевич Местников салайар бөлөҕө Дьөккөн уонна Хампа нэһилиэктэригэр сырытта.
Отчуокка нэһилиэктэр олохтоохторо көхтөөхтүк кытыннылар. Былааһы кытта аһаҕас кэпсэтии, быһаччы сибээс баарыттан астыналларын биллэрдилэр. Дьон-сэргэ долгутар боппуруостарын биэрдилэр, сиһилии эппиэт иһиттилэр.
Дьөккөҥҥө
✅ Олохтоох көҕүлээһини өйүүр бырагырааматын куонкуруһугар туох-ханнык критерийынан талалларын ыйыттылар, Дьөккөн нэһилиэгэ үһүс сылын кыттар даҕаны биирдэ да хапсыбатаҕын этиннилэр. Манна тустаах министиэристибэ өттүттэн боротокуол оҥоһуллара наадалааҕын, нэһилиэктэр куонкуруска ыытар бырайыактара туох-эмит сыыһалаах, итэҕэстээх буоллаҕына ону билиэн баҕараллара оруннааҕын Сергей Местников бэлиэтээтэ.
✅ Нэһилиэк дьоно былыр-былыргаттан бултаан кэлбит сирдэригэр бултуур бырааптара күөмчүлэнэн, охотобществолар бас билэр сирдэрэ чопчуланыан наадатын эттилэр.
✅ Лүксүгүн учаастагын гаастаныытын туруорустулар.
✅ Өртөөһүн тыа хаһаайыстыбатыгар дьиҥ-чахчы туһалаах ньыма буоларын, өртөөһүн ыытыллыбакка, хаппыт-хагдарыйбыт үүнээйи элбээн, баһаар үөскүүрүгэр төрүөт буоларын бэлиэтээтилэр, өртөөһүн ыытыытын боломуочуйатын олохтоох дьаһалталарга бэриллэригэр көрдөстүлэр.
✅ Бүлүү бөлөххө тыа хаһаайыстыбатын форумун ыытарга этии киллэрдилэр.
✅ Дьөккөттөр киэн туттар биир дойдулаахтара Сэбиэскэй Сойуус Геройа Николай Алексеевич Кондаков аатын Саха национальнай көрдөрөр-иһитиннэрэр хампаанньаҕа иҥэрэргэ баҕа санааларын эттилэр.
✅ Эдэр специалистарга олорор усулуобуйа көрүллэн, саҥа дьиэ тутуллара наадалааҕын ыйдылар.
✅ Нэһилиэккэ спортзал тутуутун туруорустулар.
✅ Кулууп тутуутун ханнык бырагыраамаҕа киллэрэн туруорсуохтарын сөбүн ыйытылар.
Хампаҕа
✅ Хампа олохтоохторо эмиэ өртөөһүн боппуруоһун күүстээхтик модьуйдулар. Өртөөһүн ходуһаны чэбдигирдии биир ньыматынан буоларын, ойуур баһаара аҕыйыырыгар тэрээһиннээх өртөөһүн көмөлөһөрүгэр бигэ санаалаахтарын биллэрдилэр.
✅ Сылгы айан суолугар киирэн массыыналар түҥнэри көттөхтөрүнэ буруй уонна хоромньу барыта сылгы хаһаайыттарыгар сүктэрэллэрэ сыыһатын ыйдылар.
✅ Мелиорация үлэтэ ыытыллара сүөһү ахсаанын тутан олороллоругар дьоһун көмө буолуо этэ диэн эттилэр.
✅ Оскуола интернатыгар атын улуустан, чугастааҕы нэһилиэктэртэн элбэх оҕо олоро кэлэрин, билиҥҥи кэминэн интернат дьиэтэ эргэрэн, тымныы, онон олорор усулуобуйалара тупсарылларыгар көрдөстүлэр.
✅ Дьоҕус бэкээринэлэри өйөөһүн наадатын этиннилэр.
✅ Спортзалга, кулуупка техүлэһит тиийбэтин биллэрдилэр.
✅ Хампа балыыһатын эргэ тутууларыгар өрөмүөн ыытылларыгар, саҥа аһыллыбыт реабилитационнай отделение инникитин сабыллыбатыгар көрдөстүлэр.
✅ Анал байыаннай дьайыы кыттыылаахтарыгар, кинилэр дьиэ кэргэттэригэр туох өҥө көрүллэрин ыйыттылар. Манна Бүлүү улууһун нэһилиэнньэтин социальнай көмүскэлгэ уонна үлэҕэ управлениетын салайааччыта Алина Каратаева толору эппиэт биэрдэ.
