Bu yaxınlarda rejissor Ayaz Salayevin sözləri cəmiyyətdə geniş rezonans doğurub. O, guya rus sektorunda oxuyanların azərbaycan sektorunda oxuyanlardan daha savadlı olduğunu, üstəlik, guya rus dilinin deyil, türk dilinin azərbaycan dili üçün daha təhlükəli olduğunu iddia edib. Sosial şəbəkələrdə tez-tez rast gəlinən çağırışlardan biri də Ayaz Salayevi təhqir etməmək, sadəcə tənqid etməkdir. Halbuki o, özü başqalarını təhqir etməkdən heç də çəkinmir – məsələn, onun kimi düşünənləri Rusiyanın təsir agenti hesab edənləri "beyinsiz" adlandırır, bir dildən artıq bilməyən vətəndaşları isə "səviyyəsiz" sayır.
Mənim bu cür insanlara hörmət tələb edənlərə bir xahişim var: cəmiyyəti Ayaz Salayev kimiləri ziyalı qəbul etməyə məcbur etməyin. Şovinist bir dövlətin dilini öz ana dilindən üstün tutan, xalqını alçaldan belə şəxsiyyətsizlər heç bir hörmətə layiq deyillər. Belə açıqlamalardan sonra Ayaz Salayevin bütün əvvəlki xidmətlərinin heç bir dəyəri qalmır.
İkincisi, Azərbaycanda dövlət büdcəsindən 300-dən çox rus məktəbinin maliyyələşdirilməsi bir faciədir. Dövlət dili azərbaycan dili olan bir ölkədə adi mağazada işləmək üçün belə rus dili tələb olunması nə deməkdir? Bunun axırı nə olacaq? Burada əsas günahkar Ayaz Salayev deyil, indiki hakimiyyətdir.
Rus sektorunda oxuyanların azərbaycan sektorunda oxuyanlardan daha savadlı olması fikrinə gəldikdə isə, bu, həqiqətə uyğun deyil. Nə qəbul imtahanlarında toplanan ballar, nə də şəxsi müşahidələrim bunu heç cür əks etdirmir. Ana dilində təhsil alanlar bəzən nəinki geri qalmır, hətta rus sektorunda oxuyanları həm erudisiya, həm də dünyagörüşü baxımından üstələyirlər.
