«Дыгын оонньуулара-2025»: өрөбүлгэ бүтэһик сүүмэрдиир түһүмэх Чурапчыга ыытыллыаҕа
Чурапчыга муус устар 12-13 күннэригэр Дыгын оонньууларын үһүс сүүмэрдиир түһүмэҕэ буолуоҕа. Ол түмүгүнэн сайын Үс Хатыҥҥа ыытыллар түмүктүүр күрэхтэһии 16 кыттааччытын аата биллиэҕэ.
Бөҕөстөр икки сүүмэрдиир түһүмэхтэри ааспыттарын кэнниттэн билигин Николай Матаннанов, Артём Дьяконов, Яков Дмитриев, Владимир Шологонов, Алексей Уваровскай, Вячеслав Дьяконов, Тимофей Большаков, Борис Сдвижков, Алексей Ефимов, Алексей Соколов инники күөҥҥэ (топ-10) сылдьаллар. Кинилэр бары квалификацияны ааһар кыахтаахтар.
Оттон Борис Строев, Александр Пшенников, Валентин Афанасьев, Иван Степанов, Дмитрий Петров уонна Алексей Созонов 16 бастыҥ бөҕөс иһигэр киирэллэр.
17 миэстэҕэ Үөһээ Бүлүү бөҕөһө Айсен Ботуев сылдьар. Кини сайын финалга кыттар путевканы ылар сыалтан үһүс сүүмэрдиир түһүмэххэ бастыҥ көрдөрүүлэри ситиһэрэ ирдэнэр. Кини кэнниттэн Павел Друзьянов кэлэр, ол эрээри бөҕөс эчэйии ылан аны бу сезоҥҥа күрэхтэспэт. Ол иһин ыстаҥаҕа спорт маастара, 19 миэстэҕэ сылдьар Владислав Попов (Нам улууһа) бастыҥнар ортолоругар киирэр кыахтанна.
Бастакы сүүмэрдиир түһүмэххэ уопсайа 59 спортсмен кыттыбыта. Оттон иккискэ 41 спортсмен күрэхтэспитэ.
Үһүс сүүмэрдиир түһүмэххэ кыттааччылар үгэс быһыытынан ыстаҥа, тутум эргиир, мас тардыһыы, оҕунан ытыы, сүүрүү, хапсаҕай уонна таас көтөҕүү көрүҥнэргэ киирсиэхтэрэ. Манна ылбыт баалларын ахсааннарынан бастыҥнары быһаарыахтара. Сайын Туймаада ыһыаҕар Дыгын оонньууларыгар кыттар бөҕөстөр ааттара биллиэҕэ.
@sakhasporttv
