"گؤزلرین(2)"
بیلمیرم آلاگؤز،بو آخشام ندن
دده می یاندیریرآلا گؤزلرین.
دولاشیرگؤنلومه،ائشیر ایپیمی
آز قالیر جانیمی آلا گؤزلرین.
چیخمیر خیالیمدان هئچ آخشام-سحر
اؤلدورور،دیریلدیر منی بیر تحَر
اولدوزلو گئجه دیر چیراقلی شهر
سالیر منی حالدان-حالا گؤزلرین.
سوزولور ساغ-سولا،بورولور،بورور
اولدوز تک سایریشیب،منه گؤز وورور
هرآن قاباغیمدا دایانیر،دورور
آز قالیرگؤزومو چالا گؤزلرین.
سَرین یئللرکیمی گؤنلومه اَسیر
اَسدیکجه،باغریمی دوغراییب کسیر
گؤزوندن اؤپمه یه گؤزوم تله سیر
قورخورام گؤزوندن سالا گؤزلرین.
سوزمه سی جان آلیر سوزولن زمان
سانکی داغ باشیندا اویناییر دومان
نه یامان شیرین دیر،دادلی دیر،آمان!
اولمایا باتیب دیر بالا گؤزلرین؟
بیلمیرم گؤنلومو آپاریر نییه
یوز شئعیر یازیرام،ده یمیر هئچ نه یه
کاش بیزی یارادان بیر ایش ایشله یه
اؤلونجه،«خوشنام»ا قالا گؤزلرین.
"خوشنام"
