"ယူကရိန်းစစ်ကပေးတဲ့ သင်ခန်းစာ"
===
စစ်ပွဲဟာ ဘယ်စစ်ပွဲမဆို အချိန်ကြာလာတာနဲ့အမျှ ကဏ္ဍ ပေါင်းစုံကို ထိခိုက်စေတော့တာပါပဲ။ ဥပမာ ယူကရိန်းစစ်ကြောင့် ယူကရိန်း နိုင်ငံသား သန်းပေါင်းများစွာ နေတိုး နိုင်ငံတွေထဲ ခိုဝင်ကြရတယ်။ အရွယ်ရောက်သူတိုင်းဟာ တိုင်းပြည်အတွက် မဖြစ်မနေ စစ်မှုထမ်းရတယ်။ ဒါက လက်တွေ့မြင်နိုင်တဲ့ အရှိတရားပါ။ ကြားထဲ စီးပွားရေးအရ ဆုတ်ယုတ်တာ၊ စစ်ကြောင့် ပျက်စီးသွားတဲ့အရာတွေ ပြန်လည် ထူထောင်ရေး လုပ်ဖို့ ဆိုတဲ့ ကိစ္စတွေ မပါသေးဘူး။ နှစ်ပေါင်းများစွာ အချိန်ပြန်ယူရမဲ့ အရာတွေက ဒီစစ်ပွဲတွေကြောင့်ပါပဲ။
----
အမေရိကန်နဲ့ ရုရှား တွေ့ဆုံမှု အပြီးမှာ ဇလန်စကီးကို ဖြုတ်ချချင်တော့ ယူကရိန်းနိုင်ငံရဲ့ ရွေးကောက်ပွဲအရ သမ္မတရာထူး ကန့်သတ်ချက်ကို အပြစ်ရှာလာခဲ့ကြတာ တွေ့ရတယ်။ ဒါကလည်း အကျိုးစီးပွားပါပဲ။ နေတိုးနိုင်ငံထဲ ဝင်လာချင်သူကို နည်းမျိုးစုံနဲ့ ထောက်ပံ့ကြပေမယ့် စစ်မှန်တဲ့ ကူညီမှုတော့ မဖြစ်နေပြန်ပါဘူး။ ဒါ့ကြောင့်လည်း စစ်ပွဲအတွင်း ထောက်ပံ့ခဲ့တဲ့ ကုန်ကျစရိတ် သန်း ၃၀၀ အစား ယူကရိန်းက မြေရှား သတ္တုကို အလိုရှိကြောင်း ဒေါ်နယ်ထရမ့်က ဒဲ့တောင်းဆိုခဲ့တာပါ။ တဖက်မှာ ဒီလို ဆိုရတာကလည်း အကြောင်းရှိပါတယ်။ ဥရောပမှာ ရုရှားနိုင်ငံပိုင် ဒေါ်လာတွေကို ဥရောပနိုင်ငံတွေက ထိန်းသိမ်းထားတာရှိပါသေးတယ်။ ဒီငွေတွေကိုလည်း ဒေါ်နယ်ထရမ့်တယောက် မျက်စိကျပုံပါပဲ။
------
လောလောဆယ်တော့ ဇလန်းကီးရဲ့ သမ္မတ ရာထူးဟာ အတော်လေး လှုပ်ခတ်လာခဲ့ပါပြီ။ တနေ့က လုပ်တဲ့ ယူကရိန်းပါလီမန် မဲခွဲမှုမှာ ဇလန်စကီးအတွက် လိုအပ်တဲ့ ထောက်ခံမှု မရခဲ့ဘူးလို့ ဆိုတာ တွေ့ရတယ်။ လုံခြုံရေးကောင်စီမှာ လုပ်တဲ့ ယူကရိန်းကို ရုရှားရဲ့ ကျူးကျော်မှု မဲခွဲတဲ့ကိစ္စမှာလည်း အမေရိကန်က ရုရှားနဲ့အတူ ကန့်ကွတ်မဲ ပေးတယ်လို့ သိရတယ်။ အိန္ဒိယနဲ့ တရုတ်ကတော့ ကြားနေသတဲ့။ ဆိုတော့ ဘယ်လောက် ဒီမိုကရေစီနိုင်ငံ ပါဆိုဆို၊ အင်အားကြီးတဲ့ နိုင်ငံတွေမှာလည်း ကိုယ့်ပြဿနာ ကိုယ်စီကြောင့် နှာစေးနေကြတာလည်း အံ့ဩစရာတော့ အကြောင်း မရှိပါဘူး။
------
ဒါ့ကြောင့် ယူကရိန်း စစ်က ပေးတဲ့ သင်ခန်းစာမှာ ဘယ်နိုင်ငံမှ စေတနာပါလို့ ကူတယ်ဆိုတာ မရှိဘူးဆိုတာပါပဲ။ အားလုံးဟာ အကျိုးစီးပွားတွေကိုပဲ အခြေခံကြတယ်ဆိုတာ ထင်ရှားပါတယ်။ စစ်ပွဲဟာ ကြာလာတာနဲ့အမျှ လူထု ထောက်ခံမှုလည်း ကျဆင်းလာတယ်ဆိုတဲ့ အချက်ရယ်၊ ကိုယ့်နိုင်ငံအချုပ်အခြာအတွက် ဘယ်နိုင်ငံမှ စေတနာ အပြည့်ကူတာ မရှိဘူးဆိုတဲ့ သင်ခန်းစာတွေ ဖော်ထုတ်ရတာတော့ အမှန်ပါပဲ။
(နရီမိုး)
